Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 182 Hüküm no: 119 Orijinal metin no: [38a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Dimitri’nin varislerinin annesiyle amcasının oğlu olduğu Fi’l-asl vilâyet-i Rumeli’nde Mora cezîresinde nefs-i Kalavrita kasabası ahâlîsinden olup ber-vech-i âtî verâset iddi‘â eden bakkāl Kiryazi v. Papa Yani nâm zimmî mahmiye-i mezbûrede meclis-i şer‘de fi’l-asl kasaba-i mezbûre sâkinlerinden ve bakkāl tâifesinden iken bundan akdem hâlik olan Yorgi v. Nikola nâm zimmînin sulbî oğlu olup kendiden sonra hâlik olan Dimitri nâm sagīrin anası Nazlı bt. Yavakin nâm Nasrâniye muvâcehesinde üzerine da‘vâ ve takrîr-i kelâm edip hâlik-i mezbûr Dimitri’nin babası mezbûr Yorgi’nin babası Nikola ile benim babam Papa Yani li-ebin karındaşlar olup babaları ismi İstadir ve dedeleri ismi Petro ve maskat-ı re’sleri kasaba-i mezbûre olmağla bu vechile ben hâlik-i mezbûrun ammi oğlu ve usûbet-i nesebiye cihetiyle vârisi olup hâlik-i mezbûr Dimitri’nin verâseti vâlidesi mezbûr Nazlı ile bana münhasıra olmağla hâlâ hâlik-i mezbûrun terekesini bi’l-cümle anası mezbûre Nazlı zabt etmeğin suâl olunup hâlik-i mezbûrdan bana isâbet eden hisse-i ırsiyem alıverilmek matlûbumdur dedikde gıbbe’s-suâl mezbûre Nazlı cevâbında müdde‘î-i mezbûrun ber-vech-i muharrer verâsetini ve oğlu hâlik-i mezbûrun terekesine vaz‘-ı yedini bi’l-külliye inkâr edicek evvelâ müdde‘î-i mezbûrun verâsetine beyyine taleb olundukda fi’l-asl kasaba-i mezbûre sükkânından ve mahmiye-i mezbûrede Odabaşı sûkunda bakkāl olan Anderya v. Panayot ve Unkapanı’nda kezâlik bakkāl olan Nikola v. Dimo nâm zimmîler li-ecli’ş-şehâde meclis-i şer‘e hâzırân olup isre’l-istişhâd fi’l-vâki‘ hâlik-i mezbûr Dimitri’nin babası mezbûr Yorgi’nin babası Nikola ile işbu müdde‘î-i mezbûr Kiryazi’nin babası Yani li-ebin karındaşlar olup babaları ismi İstadir ve dedeleri ismi Petro ve maskat-ı re’sleri kasaba-i mezbûre olmağla bu vechile müdde‘î-i mezbûr hâlik-i mezbûrun ammi oğlu ve usûbet-i nesebiye cihetiyle vârisidir, hâlik-i mezbûr Dimitri’nin verâseti vâlidesi mezbûre Nazlı ile müdde‘î-i mezbûr Kiryazi’ye münhasıradır bunlardan gayrı vârisi ve terekesine müstahıkk-ı âhar olduğu ma‘lûmumuz değildir biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle müdde‘î-i mezbûr Kiryazi’nin verâsetine ba‘de’l-hükm sâniyen tereke-i hâlik-i mezbûra vâlidesi mezbûre Nazlı’nın vaz‘-ı yedine beyyine taleb olundukda ityân-ı beyyine için mehl-i şer‘î ile ba‘de’l-imhâl mâ-vaka‘a bi’t-taleb ketb olundu. Fi’l-yevmi’l-hâdi ve’l-ışrîn min-Saferi’l-hayr li-sene sitte aşere ve mi’e ve elf. Şuhûdü’l-hâl: Hüseyin Efendi el-kādı, İsmail Efendi el-kâtib, Ömer Efendi el-kâtib, Veliyüddin Efendi el-kādı, Mehmed Emin Efendi el-kādı, el-Hâc Yusuf b. Osman.