Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 181 Hüküm no: 118 Orijinal metin no: [37b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Mahmud’un annesi Rukıye aleyhindeki menzil davasının reddedilmesi Mahmiye-i İstanbul’da Parmakkapı kurbünde Hüseyin Ağa mahâllesinde sâkin Mehmed b. el-Hâc Mahmud nâm kimesne mahmiye-i mezbûrede meclis-i şer‘de vâlidesi işbu râfi‘atü’l-vesîka Rukıye bt. Mehmed nâm hatun mahzarında üzerine da‘vâ ve takrîr-i kelâm edip mahâlle-i mezbûrede vâki‘ Kaliçeci Hasan Mescidi Evkāfı’ndan olup icâreteyn-i ma‘lûmeteyn ile ma‘lûmü’l-hudûd menzilin nısfı babamdan bana intikāl-i âdî ile intikāl etmekle nısf menzil-i mezbûru hâl-i suğrumda kıbel-i şer‘den mansûbe vasîm olan vâlidem mezbûre Rukıye’ye bin yüz sekiz senesinde ferâğ ve yedine temessük aldıkdan sonra ben kebîr ve bâliğ olmayıp hâl-i suğrumda olan ferâğ mu‘teber olmamağla hâlâ nısf menzil-i mezbûru vâlidem merkūme Rukıye’den taleb ederim, suâl olunsun dedikde, gıbbe’s-suâl mezbûre Rukıye cevâbında fi’l-vâki‘ nısf menzil-i mahdûd-ı mezbûru oğlu müdde‘î-i mezbûrun vasîsi mezbûr Mehmed’in suğru hâlinde târîh-i mezbûrda ferâğını ikrâr lâkin târîh-i kitâbdan bir sene mukaddem oğlum müdde‘î-i mezbûr âkıl ve bâliğ ve reşîd oldukdan sonra oğlum müdde‘î-i mezbûra bi-tarîkı’s-sulh yüz guruş verip ol dahi ba‘de’l-ahz ve’l-kabz ferâğ-ı mezbûru tecvîz edip menzil-i mahdûd-ı mezbûra müte‘allıka âmme-i da‘vâdan benim zimmetimi ibrâ ve iskāt etmiş idi deyü def‘le mukābele edicek gıbbe’l-istintâk ve’l-inkâr mezbûre Rukıye’den def‘-i mezkûruna beyyine taleb olundukda udûl-i ahrâr-ı ricâl-i Müslimînden olup mahâlle-i mezbûre ahâlîsinden Mehmed b. Ahmed ve Mustafa b. İbrahim ve Mehmed b. Yusuf nâm kimesneler li-ecli’ş-şehâde meclis-i şer‘e hâzirûn olup istişhâd olunduklarında fi’l-vâki‘ müdde‘î-i mezbûr Mehmed âkıl ve bâliğ ve reşîd oldukdan sonra târîh-i kitâbdan bir sene mukaddem nısf menzil-i mezbûru hâl-i suğrunda vasîsi vâlidesi mezbûre Rukıye’ye ferâğı mu‘teber olmadığına binâen oğlu müdde‘î-i mezbûr Mehmed’e alâ-tarîkı’s-sulh vâlidesi mezbûre Rukıye yüz guruş verip ol dahi ba‘de’l-ahz ve’l-kabz ferâğ-ı mezbûru tecvîz edip menzil-i mahdûd-ı mezbûra müte‘allıka âmme-i da‘vâdan vâlidesi mezbûre Rukıye’nin zimmetini bizim huzûrumuzda ibrâ ve iskāt eyledi, biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince müdde‘î-i mezbûr Mehmed vâlidesi merkūme Rukıye’ye bî-vech mu‘âraza’dan men‘ olunup mâ-vaka‘a bi’t-taleb ketb olundu. Fi’l-yevmi’l-ışrîn min-Saferi’l-hayr sene sitte aşere ve mi’e ba‘de’l-elf. Şuhûdü’l-hâl: Hasan Çelebi b. Ahmed, Abdurrahman b. Mehmed, Odabaşı Mehmed Beşe, Çizmeci Mehmed b. ( ), Helvacı Hüseyin Ağa b. ( ).