Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 181 Hüküm no: 117 Orijinal metin no: [37b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Meryem Hatun’un Rus asıllı cariyesi Gülistan’ı azat etmesi Mahmiye-i İstanbul’da Yenibahçe kurbünde Karabaş mahâllesinde sâkine Meryem bt. el-Hâc Ramazan nâm Hatun’un zevci ve tarafından husûs-ı âti’l-beyana vekîl olduğu zât-ı mezbûreyi ma‘rifet-i şer‘iyye ile ârifân İmam es-Seyyid Mehmed Efendi b. es-Seyyid Hasan Efendi ve Mehmed Efendi [b.] Şaban nâm kimesneler şehâdetleri ile sâbit olan Ahmed Çelebi b. Mustafa nâm kimesne mahmiye-i mezbûrede meclis-i şer‘-i hatîrde müvekkile-i mezbûreye rıkk-ı sâbıkını mu‘terife olan işbu orta boylu açık kaşlı elâ gözlü, Rusiyyetü’l-asl Müslimetü’l-mille bâ‘isetü’l-vesîka Gülistan bt. Abdullah mahzarında ikrâr ve takrîr-i kelâm edip zevcem müvekkile-i mezbûre kendüye rıkkını mu‘terife olan mevsûfe-i mezbûre Gülistan’ı hasbeten lillâhi’l-meliki’l-Hallâk ve taleben li-merzâti’r-Rabbi’r-Rezzâk malından tahrîr ve i‘tâk edip sâir harâir-i asliyât zümresine idrâc ve ilhâk eyledi, ba‘de’l-yevm mevsûfe-i mezbûre Gülistan, sâir harâir-i asliyât gibi hürre olup müvekkile-i mezbûrenin mevsûfe-i mezbûre üzerinde velâ-i şer‘iyyeden gayrı hakkı kalmadı dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’l-hâdi ve’l-ışrîn min-Saferi’l-hayr li-sene sitte aşere ve mi’e ve elf. Şuhûdü’l-hâl: Mustafa Beşe b. Hasan, Mustafa Çelebi b. Abdurrahman, Mehmed Çelebi b. Mehmed, el-Hâc Mehmed b. Mustafa, Molla Ali b. Mehmed, es-Seyyid Hasan Çelebi b. Ahmed.