Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 186 Hüküm no: 124 Orijinal metin no: [38b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kerek Beyi Mehmed Bey’in Rus asıllı cariyesini satması Medîne-i Şam-ı şerîf ahâlîsinden olup Kerek Beyi olan Mehmed Bey b. Ahmed Paşa mahmiye-i İstanbul’da meclis-i şer‘de işbu râfi‘ü’l-vesîka el-Hâc Mehmed b. Osman nâm kimesne mahzarında ikrâr ve takrîr-i kelâm edip bundan akdem işbu hâzır bi’l-meclis es-Seyyid Mustafa b. Sipâhî nâm kimesneye evsâfı beynimizde ma‘lûm Rusiyyetü’l-asl Gülbuy isminde yedimde mülküm olan bir re’s câriyemi alâ-tarîkı’l-emâne yedine teslîm ol dahi ba‘de’l-ahz câriye-i mezkûre Gülbuy’u mezbûr el-Hâc Mehmed’e tarafımdan fuzûlen vekâleten yüz altmış guruş semen-i makbûza bey‘ ve teslîm etmekle ben dahi câriye-i mezkûre[yi] mezbûr el-Hâc Mehmed’den taleb ve da‘vâ sadadinde olmuş idim. El-hâletü hâzihi mezbûr el-Hâc Mehmed câriye-i mezkûreyi bana redd ü teslîm ben dahi ba‘de’l-ahz semen-i mezkûr yüz altmış guruşa mezbûr es-Seyyid Mustafa merkūm el-Hâc Mehmed’e def‘ ü teslîm eyledikden sonra mârrü’z-zikr câriye-i mezbûre Gülbuy’u tarafından îcâb ve kabûlü hâvî bey‘-i kat‘î ile mezbûr el-Hâc Mehmed’e iki yüz yirmi guruşa bey‘ ve teslîm ol dahi yedimden iştirâ ve tesellüm eyledikden sonra semeni olan meblağ-ı mezbûr iki yüz yirmi guruşu tamâmen yedinden ahz u kabz edip husûs-ı mezbûra müte‘allıka da‘vâdan merkūm el-Hâc Mehmed’i ibrâ ve iskāt eyledim. Ba‘de’l-yevm zikr olunan [câriye-i merkūmede] benim alâkam kalmadı dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Saferi’l-hayr li-sene sitte aşere ve mi’e ve elf. Şuhûdü’l-hâl: Hüseyin Efendi kâtib, diğer Hüseyin Efendi imam-ı Âşık Paşa, İbrahim Efendi el-müezzin, Sadi Efendi Halîfe-i kütüb?, Hüseyin Çelebi bakkāl, es-Seyyid Mustafa Çelebi b. İbrahim.