Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 189 Hüküm no: 129 Orijinal metin no: [39b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayni Hatun’un İlyas b. Hızır aleyhindeki değirmen satışı davasında anlaşma sağlanması Medîne-i Üsküdar muzâfâtından Gekbûze nâhiyesine tâbi‘ Göçbeyli nâm karye sâkinelerinden Aynî bt. Mehmed nâm hatun zâtı ba‘de’t-ta‘rîfi’ş-şer‘î meclis-i [mahmiye-i] İstanbul’da meclis-i şer‘-i enverde işbu râfi‘ü’l-vesîka İlyas b. Hızır nâm kimesne mahzarında ikrâr ve takrîr-i kelâm edip bundan akdem yedimde mülküm olup nâhiye-i mezbûra tâbi‘ Aydınlı nâm karyede vâki‘ Kumluca suyu üzerinde dâir bir tarafdan dere ve bir tarafdan Balıkçı Ali nâm kimesne tarlası ve bir tarafdan Arslanoğlu Mehmed mülkü ve bir tarafdan tarîk-i âm ile mahdûd bir göz değirmen ile değirmen-i mezkûra muttasıl mülk bahçemi mezbûr İlyas’a iki yüz guruş semen-i makbûza bey‘ ve teslîm ol dahi iştirâ ve tesellüm etmişdi. Lâkin hîn-i bey‘de ziyâde değmez deyü beni tağrîr ve semeninden noksân-ı fâhiş ile almağla ben dahi ber-vech-i muharrer müdde‘âmı isbât sadedinde iken beynimize muslihûn tavassut edip da‘vâ-i mezkûremden beni mezbûr İlyas ile yirmi üç guruş üzerine akd-i musâlaha eylediklerinde ben dahi sulh-ı mezbûru ba‘de’l-kabûl bedel-i sulh olan meblağ-ı mezbûru yirmi üç guruşu yedinden tamâmen ba‘de’l-kabz husûs-ı mezbûra müte‘allıka âmme-i da‘vâdan mezbûr İlyas’ın zimmetini ibrâ ve iskāt eyledim dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-s-sâlis ve’l-ışrîn min-Saferi’l-hayr li-sene sitte aşere ve mi’e ve elf Şuhûdü’l-hâl: Mehmed Beşe b. Mustafa, Ali b. Hasan, Musa b. Hasan, Osman Beşe b. Abdullah, Mehmed b. Mustufa, el Hâc Mehmed b. Hüseyin, Sefer Beşe b. Ali, Hüseyin Beşe b. Osman, Ali b. İbrahim, Halil Beşe b. İbrahim