Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 188 Hüküm no: 128 Orijinal metin no: [39a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim ve Ahmed’in vasileri olan babaları Hüseyin’in Ali b. Davud aleyhindeki alacak davasının reddedilmesi Mahmiye-i İstanbul’da Kumkapı dâhilinde sâkine iken bundan akdem fevt olan Âişe bt. Mahmud nâm hatunun sulbî sagīr oğulları İbrahim ve Ahmed’in tesviye-i emrlerine kıbel-i şer‘den mansûb vasîleri babaları el-Hâc Hüseyin b. Ömer nâm kimesne mahmiye-i mezbûrede meclis-i şer‘de el-Hâc Ali b. Davud nâm kimesne mahzarında üzerine bi’l-vesâye da‘vâ ve takrîr-i kelâm edip mezbûr el-Hâc Ali zimmetinde vasîleri olduğum sagīrân-ı mezbûrânın iki yüz seksen guruş hakları olup meblağ-ı mezbûru bundan akdem mezbûr el-Hâc Ali’den bi’l-vesâye taleb ve da‘vâ sadedinde olduğumda beynimize muslihûn tavassut [edip] meblağ-ı mezbûr da‘vâsından beni bi’l-vesâye mezbûr el-Hâc Ali ile iki yüz kırk guruş üzerine akd-i musâlaha eylediklerinde ben dahi sulh-ı mezbûru ba‘de’l-kabûl [39b] bedel-i sulh olan meblağ-ı mezbûru yedinden ahz u kabz edip bâkī kırk guruşdan merkūm el-Hâc Ali’yi bi’l-vesâye ibrâ etmiş idim. Lâkin ber-vech-i muharrer sagīrân-ı mezbûrân haklarında sulh ve ibrâ meşrû‘ olmamağla meblağ-ı mezbûrdan bâkī kırk guruşu hâlâ mezbûr el-Hâc Ali’den bi’l-vesâye taleb ederim, suâl olunsun dedikde, gıbbe’s-suâl mezbûr el-Hâc Ali cevâbında fi’l-hakīka sagīrân-ı mezbûrân İbrahim ve Ahmed deyni olan meblağ-ı mezbûr iki yüz seksen guruşu vasiyy-i mezbûr el-Hâc Hüseyin ile iki yüz kırk guruş üzerine sulh olup ve bedel-i sulhu kendüye def‘ ü teslîm edip, eğer sagīrân-ı mezbûrân ba‘de’l-bülûğ meblağ-ı bâkī-i mezbûr kırk guruşu benden taleb ve da‘vâ ederlerse vasiyy-i merkūm el-Hâc Hüseyin kendi malından zâmin olmak üzere benim zimmetimi ibrâ etmişdir deyü def‘le mukābele edicek gıbbe’l-istintâk ve’l-inkâr mezbûr el-Hâc Ali’den def‘-i mezkûruna beyyine taleb olundukda udûl-i Müslimînden olup Kumkapı dâhilinde Süleyman Ağa mahâllesinde sâkin İsa b. Abdünnebi ve Mahmud b. Hüseyin nâm kimesneler li-ecli’ş-şehâde meclis-i şer‘e hâzırân olup istişhâd olunduklarında fi’l-vâki‘ vasiyy-i merkūm el-Hâc Hüseyin bundan akdem merkūm el-Hâc Ali ile meblağ-ı mezbûr ikiyüz seksen guruşu iki yüz kırk guruşa sulh olup ve bedel-i sulh olan meblağ-ı mezbûru yedinden ahz u kabz edip vasîleri olduğu sagīrân-ı mezbûrân İbrahim ve Ahmed ba‘de’l-bülûğ meblağ-ı mezbûr kırk guruşu merkūm el-Hâc Ali’den taleb ve da‘vâ ederler ise vasiyy-i merkūm el-Hâc Hüseyin kendi malından vermek üzere huzûrumuzda zâmin olup bâkī kırk guruşa müte‘allıka da‘vâdan mezbûr el-Hâc Ali’nin zimmetini ibrâ etmişdi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcibiyle vasiyy-i merkūm el-Hâc Hüseyin mezbûr el-Hâc Ali’ye bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’l-ışrîn min-Saferi’l-hayr li-sene sitte aşere ve mi’e ve elf. Şuhûdü’l-hâl: el-Hâc Mehmed Efendi el-kādı, İsmail Efendi el-kâtib, Ömer Efendi el-kādı, Veliyüddin Efendi el-kādı, Mehmed Emin Efendi el-kādı, el-Hâc Yusuf.