Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 188 Hüküm no: 127 Orijinal metin no: [39a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun’un yaralama davasında anlaşma sağlanması Mahmiye-i İstanbul’da Seferikoz mahâllesinde sâkine zâtı ta‘rîf-i şer‘î ile mu‘arrefe olan Fâtıma bt. Süleyman nâm hatun mahmiye-i mezbûrede meclis-i şer‘-i hatîr-i lâzımü’t-tevkīrde işbu bâ‘isü’s-sifr Banik v. Abnik nâm zimmî muvâcehesinde ikrâr ve takrîr-i kelâm edip târîh-i kitâb günü mahmiye-i mezbûrede vâki‘ Sultân Selim Çarşısı kurbünde gelirken merkūm Banik’in yedinde mülkü olan katırını mezbûr Banik yularından yeder olduğu hâlde kıç ayağı ile sol kolumu depip pazumun kemiğini kırmışdır deyü mûceb-i şer‘îsini mezbûr Banik’den da‘vâ etmek sadedinde olduğumda mezbûr Banik dahi husûs-ı mezbûru inkâr etmekle ben dahi müdde‘âmı isbâtdan âcize olup bu vech üzere mezbûr Banik ile nizâ‘ üzere iken beynimize muslihûn tavassut edip da‘vâ-i mezbûremden beni mezbûr Banik ile an-inkâr beş guruş üzerine sulh etdiklerinde ben dahi sulh-ı mezbûru kabûl ve bedel-i sulh olan meblağ-ı mezbûr beş guruşu mezbûr Banik işbu meclis-i şer‘de tamâmen bana def‘ ü teslîm ben dahi yedinden ahz u kabz eylediğimden husûs-ı mezbûra ve mâ-yahdesu minhuya müte‘allıka âmme-i da‘vâdan mezbûr Banik’in zimmetini ibrâ-i âm ile ibrâ ve iskāt eyledim dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis ve’l-ışrîn min-Saferi’l-hayr li-sene sitte aşere ve mi’e ve elf. Şuhûdü’l-hâl: Ahmed Beşe b. Osman, Ali Beşe b. Şahin, Mustafa Beşe b. Muharrem, Ali Beşe b. Mehmed, Ahmed Beşe b. Mustafa, Mehmed b. Mustafa, el-Hâc Yusuf b. Osman.