Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 187 Hüküm no: 126 Orijinal metin no: [39a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Ali’nin eşi Mehmed Çelebi’den muhalaa usulüyle boşanması Mahmiye-i İstanbul’da Müftî Ali Çelebi mahâllesi sâkinelerinden olup hâlâ âkıle ve bâliğa olduğu zeyl-i kitâbda muharrerü’l-esâmi Müslimîn ihbârları ile mütebeyyin olan Hadîce bt. Ali nâm hatun tarafından husûs-ı câ’i’z-zikre vekîl olup zât-ı mezbûreyi ma‘rifet-i şer‘iyye ile ârifân Mehmed Çelebi b. İbrahim ve es-Seyyid Ahmed Çelebi b. Ebubekir Efendi nâm kimesneler şehâdetleri ile vekâleti sâbite olan İmam Mehmed Efendi b. Salih nâm kimesne mahmiye-i mezbûrede meclis-i şer‘-i hatîrde müvekkile-i mezbûrenin zevc-i muhâlı‘ı işbu bâ‘isü’l-kitâb es-Seyyid Mehmed Çelebi b. es-Seyyid Ali nâm kimesne mahzarında bi’l-vekâle ikrâr ve takrîr-i kelâm edip mezbûr es-seyyid Mehmed Çelebi müvekkile-i mezbûre Hadîce Hatun’un zevci olup beynlerinde hüsn-i zindegâneleri olmamağla müvekkile-i mezbûre hul‘a tâlibe olduğu ecilden bedel-i hul‘ olmak üzere zevci mezbûr es-Seyyid Mehmed’e malından yirmi beş guruş def‘ ü teslîm edip ol dahi ahz u kabz eylediğinden sonra zevci mezbûr es-Seyyid Mehmed Çelebi zimmetinde mütekarrer ve ma‘kūdün-aleyh olan kırk guruş mehr-i müecceli ve nafaka-i iddet-i ma‘lûmesi üzerlerine ve meûnet-i süknâsı dahi kendi üzerine olmak üzere mezbûr es-Seyyid Mehmed Çelebi ile muhâla‘a-i sahîha-i şer‘iyye ile muhâla‘a edip ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete ve bedel-i hul‘a ve gayri da‘vâdan müvekkile-i mezbûre mezbûr es-Seyyid Mehmed Çelebi’nin zimmetini ibrâ ve iskāt eyledi dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Saferi’l-hayr li-sene sitte aşere ve mi’e ve elf. Şuhûdü’l-hâl: Hüseyin Efendi el-kādı, İbrahim Beşe b. Mehmed, İbrahim Çelebi b. ( ), el-Hâc Derviş b. Ebubekir, el-Hâc Ahmed Ağa b. ( ) İsmail Efendi el-kâtib, Ömer Efendi el-kâtib, el-Hâc Yusuf b. ( ), Mehmed Çelebi b. Halil, el-Hâc Mehmed b. Şaban.