Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 197 Hüküm no: 138 Orijinal metin no: [41b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Çelebi’nin Ömer Çelebi ile olan alacak davasında anlaşma sağlanması Mahmiye-i İstanbul’da Sultân Selim Câmi‘-i şerîfi kurbünde Çukur odalarda sâkin Hüseyin Çelebi b. Hamza nâm kimesne mahmiye-i mezbûrede meclis-i şer‘-i hatîr-i lâzımü’t-tevkīrde işbu bâ‘isü’l-vesîka işbu bâ‘isü’l-kitâb Ömer Çelebi b. ( ) nâm kimesne mahzarında ikrâr ve takrîr-i kelâm edip târîh-i kitâbdan on üç gün mukaddem ben Fenerkapısı dâhilinde Rubler nâm Yahûdînin menzilinde uyur iken mezbûr es-Seyyid Ömer Çelebi zıbın cebimi yarıp içinden bir tuğrâlı altın ve otuz dokuz şerîfî altınım ile bir sîm pazubendimi bi-gayrı hakkın ahz u kabz etmekle zikr olunan altınların on sekiz şerîfî ile bir tuğrâlı altını ve pazubendimi mezbûr es-Seyyid Ömer Çelebi’den ahz u kabz edip mâ‘adâsı olan yirmi şerîfî altınımı taleb eylediğimde ol dahi bi’l-külliye inkâr etmekle beynimize muslihûn tavassut edip beni müdde‘âm olan yirmi bir şerîfî altın da‘vâsından mezbûr es-Seyyid Ömer Çelebi ile yirmi guruş üzerine sulh etdiklerinde ben dahi sulh-ı mezbûru ba‘de’l-kabûl bedel-i sulh olan meblağ-ı mezbûrdan nakid sekiz guruş ve on iki guruş kıymetli bir pirinç akreb sâ‘at alıp bu vech üzere bedel-i sulh-ı mezbûr yirmi guruşu mezbûr es-Seyyid Ömer Çelebi yedinden tamâmen ahz u istîfâ edip husûs-ı mezbûra müte‘allıka da‘vâdan mezbûr es-Seyyid Ömer Çelebi’nin zimmetini ibrâ ve iskāt eyledi dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min-Saferi’l-hayr li-sene sitte aşere ve mi’e ve elf. Şuhûdü’l-hâl: Abdullah Çelebi b. Abdullah, es-Seyyid Abdullah Çelebi b. es-Seyyid Hüseyin, es-Seyyid Mehmed Çelebi b. es-Seyyid Hamza, Mehmed Efendi b. el-kādı, el-Hâc Yusuf b. ( ).