Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 198 Hüküm no: 139 Orijinal metin no: [41b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Evliyâ Mehmed Efendi’nin borçları için varisleri tarafından menzilinin müştemilatıyla birlikte satılması Mahmiye-i İstanbul’da Çıkrıkçı Kemâl mahâllesinde sâkin iken düyûnu terekesinden ezyed olduğu hâlde bundan akdem vedâ‘-ı âlem-i fânî eden merhûm Evliyâ Mehmed Efendi b. Mahmud Efendi’nin verâseti sulbî kebîr oğulları fahrü’l-müderrisîn Ali Efendi’ye ve Mehmed Emin Efendi’ye ve sulbî sagīr oğlu Abdurrahman’a münhasıra olup ba‘dehû merkūm Mehmed Emin Efendi dahi vefât edip verâseti vâlidesi Hadîce bt. Hüseyin Efendi’ye ve zevcesi Âişe bt. Mustafa’ya ve sagīr oğlu Ahmed’e münhasıra olduğu şer‘an sâbit ü zâhir oldukdan sonra merkūm Ali Efendi asâleten ve sagīr-i mezbûr Abdurrahman’ın vasiyy-i şer‘îsi Süleyman Efendi b. Mehmed vesâyeten ve sagīr-i mezbûr Ahmed’in kıbel-i şer‘den mansûb vasîsi ve mezbûrân Âişe ve Hadîce taraflarından husûs-ı âti’l-beyana vekîlleri olduğu nehc-i şer‘î ve tarîk-i mer‘î üzere sâbit olan Mehmed Ağa b. ( ) nâm kimesne vesâyeten ve vekâleten mahmiye-i mezbûrede meclis-i şer‘-i hatîr-i lâzımü’t-tevkīrde hâlâ Anadolu Muhâsebecisi olan umdetü erbâbi’t-tahrîr ve’l-kalem zübdetü ashâbü’t-tastîr ve’r-rakam Mustafa Efendi b. ( ), tarafından husûs-ı âti’l-beyana vekîl-i müsecceli olan Ahmed Efendi b. el-Hâc Ali Efendi mahzarında her biri ikrâr ve takrîr-i kelâm edip müteveffâ-yı merkūm Evliyâ Mehmed Efendi’nin düyûn-ı kesîresi [42a] olmağla terekesinden olup mahâlle-i mezbûrede vâki‘ taraf-ı râbiası Çadırcı Muhyiddin Mektebi ve Kuloğlanı ( ) mülkü ve Yusuf Efendi mülkü ve mahâlle-i mezbûre vakfından olan camcı ve attâr dükkânları ve tarîk-i âm ile mahdûd dâhiliyesinde fevkānî yedi bâb oda ve iki sofa ve kenîf ve üç bâb tahtânî oda ve bir sofa ve matbâh ve bir hamam ve kenîf ve üç kârgîr mahzen ve bir masura mâ-i cârî ve bahçe ve bahçe içinde fıskiyeli köşkü ve bir mâbeyn odası ve mâbeyninde iki halvetli bir hamamı ve câmekân ve kenîf ve matbâhı ve havluyu ve hâriciyesinde dahi tabaka-i ulyâda dört bâb oda ve iki kenîf ve bir kasr ve iki sofa ve vüstâda dört bâb oda ve altında bir kebîr ahır ve samanhâne ve bahçe ve bahçe içinde köşkü ve havluyu muhtevî mülk menzilden gayrı ismi mâl ıtlâk olunur terekesi olmamağla zarûret-i deyn için menzil-i mahdûd-ı mezkûrun bey‘i lâzım gelmeğin her birimiz asâlet ve vekâletimiz hasebiyle menzil-i mahdûd-ı mezkûru bundan akdem bi’l-izni’ş-şer‘î mezâda verip sûk-ı sultânîde iki aydan mütecâviz mecma‘-ı nâs olan mahâllerde nidâ ve müzâyede etdirip rağabât-ı nâs bi’l-külliye münkatı‘a oldukdan sonra menzil-i mezbûr semen-i misli olan beş bin altı yüz guruşda müvekkil-i mûmâ-ileyh Mustafa Efendi üzerinde karâr edip ziyâde ile tâlib-i âhar zuhûr etmediğinden mâ‘adâ meblağ-ı mezbûr menzil-i mahdûd-ı mezkûru zarûret-i deyn için bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî bey‘-i kat‘î ile semen-i misli olan meblağ-ı mezbûr beş bin altı yüz guruşa müvekkil-i mûmâ-ileyh Mustafa Efendi’ye bey‘ ve teslîm ol dahi ber-vech-i muharrer iştirâ ve tesellüm ve kabûl eylediğinden sonra semeni olan meblağ-ı mezbûr beşbin altı yüz guruşu müvekkil-i mûmâ-ileyh Mustafa Efendi tamâmen bize def‘ ü teslîm biz dahi yedinden ahz u kabz eyledik, ba‘de’l-yevm menzil-i mahdûd-ı mezkûrda müteveffâ-yı mezbûrun veresesi mezbûrûndan birisinin alâkası ve medhalleri kalmayıp müvekkil-i mûmâ-ileyh Mustafa Efendi’nin mülk-i müşterâsı ve hakk-ı sırfı olmuşdur, keyfe mâ yeşâ ve yahtâr mutasarrıf olsun dediklerinde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 26 min-Saferi’l-hayr li-sene 1116. Şuhûdü’l-hâl: Sadık Efendi b. Ali Efendi, Ahmed Ağa kapıcıbaşı, Hüseyin Ağa b. Ömer, İbrahim Çelebi b. Mahmud, el-Hâc Osman Ağa b. Mehmed, el-Hâc Mustafa Ağa b. Mehmed, Süleyman b. Mehmed, Mehmed Beşe çukadâr.