Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 304 Hüküm no: 269 Orijinal metin no: [70a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karaman Hamamı’nda bulunan ve Ümmühani bt. Hüseyin’e teslim olunan Hüseyin isimli altı aylık çocuk için nafaka tahsis olunması Mahmiye-i İstanbul’da Mesih Alipaşa mahâllesinde sâkine olup zâtı ta‘rîf-i şer‘î ile mu‘arrefe olan Ümmühani bt. Hüseyin nâm hatun mahmiye-i mezbûrede meclis-i şer‘-i hatîrde takrîr-i kelâm edip târîh-i kitâbdan üç gün mukaddem Karaman Hamamı’nda bulunup meclis-i şer‘de bana teslîm ve işbu yedimde olup tahmînen altı aylık Hüseyin ismiyle tesmiye olunan sagīri irzâ‘ ve infâk eder kimesne bulunmamak ile sagīr-i mezbûru hakk-ı taleb ve ahz eder kimesne zuhûr edinceye değin kadr-ı kifâye nafaka ve kisve-baha farz ve takdîr olunmak matlûbumdur dedikde, hâkim-i muvakkı‘-ı sadr-ı kitâb hazretleri dahi sagīr-i mezbûrun nafaka ve kisve ve sâir levâzım-ı zarûriyesi için târîh-i kitâbdan beher yevm ikişer para nafaka farz ve takdîr edip meblağ-ı mefrûz-ı mezbûru sagīr-i mezbûrun nafaka ve kisve ve sâir levâzım-ı zarûriyesi için harc u sarfa ve vakt-i zarûretde istidâne ve lede’z-zafer hakk-ı taleb zuhûr ettikde rücû‘a mezbûr Ümmühani’ye izin vermeğin mâ-vaka‘a bi’t-taleb ketb olundu. Fi’l-yevmi’s-sâbi‘ min-şehri Rebî‘i’l-âhir li-sene sitte aşere ve mi’e ve elf. Şuhûdü’l-hâl: Ömer Efendi kâtib, Veliyüddin Efendi kâtib, Mustafa Efendi kâtib, Emin Mehmed Efendi kâtib, Hüseyin Efendi kâtib, el-Hâc Yusuf b. ( ).