Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 310 Hüküm no: 277 Orijinal metin no: [71b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani Hatun ve çocukları Mustafa ve Fatıma’nın mirastan dolayı Mahmud Efendi’de olan alacaklarının tahsil edilmesi Fi’l-asl medîne-i Bursa’da İnebey mahâllesi ahâlîsinden olup Zile kasabasında müsâfiren sâkin iken bundan akdem vefât eden Belgradî Mehmed Çelebi b. Murad nâm kimesnenin verâseti zevce-i metrûkesi Ümmühani bt. Mustafa nâm hatun ile sulbî sagīr oğlu Mustafa’ya ve sagīre kızı Fâtıma’ya münhasıra olduğu müte‘ayyin oldukdan sonra mezbûre Ümmühani kendi tarafından asâleten ve sagīrân-ı mezbûrânın tesviye-i emrlerine kıbel-i şer‘den mansûbe vasîsi olmağla vesâyeten mahmiye-i İstanbul’da meclis-i şer‘de bâ‘isü’l-vesîka Mahmud Efendi b. Yusuf mahzarında bi’l-asâle ve bi’l-vesâye ikrâr ve takrîr-i kelâm edip mûrisimiz müteveffâ-yı mezbûr hayâtında merkūm Mahmud Efendi’ye îdâ‘ ve teslîm eylediği seksen beş guruşdan mâ‘adâ merkūm Mahmud Efendi zimmetinde cihet-i karz-ı şer‘îden dört yüz elli guruş ve bir re’s katır semeninden dahi yirmi beş guruş min-haysü’l-mecmû‘ beş yüz altmış guruş hakkı olup kable’l-ahz fevt olmağın meblağ-ı mezbûr veresesine intikāl etmekle meblağ-ı mezbûrun bundan akdem üç yüz otuz guruşunu mezbûr Mahmud Efendi yedinden ben ahz u kabz edip bâkī zimmetinde iki yüz yirmi beş guruş kalmış idi. El-hâletü hâzihi meblağ-ı bâkī-i mezbûr iki yüz yirmi beş guruşu dahi merkūm Mahmud Efendi bana def‘ ü teslîm ben dahi yedinden asâleten ve vesâyetim hasebiyle alıp kabz edip meblağ-ı mezbûr beş yüz altmış guruşdan merkūm Mahmud Efendi zimmetinde bir nesne bâkī kalmadı dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 8 min-Rebî‘ülâhir sene 1116. Şuhûdü’l-hâl: Mehmed Efendi el-kâtib-i Bayram, Mustafa Çelebi b. İbrahim, Mehmed Çelebi b. İsmail, Süleyman b. Mehmed, Molla Mehmed b. İbrahim, Mehmed Çelebi Sarrâc, Ahmed Efendi b. Ahmed, Ahmed Efendi b. Ömer, Ali Efendi b. Abdurrahim, Mehmed Çelebi b. Ahmed, Mustafa Çelebi b. Ahmed.