Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 310 Hüküm no: 276 Orijinal metin no: [71a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Abdullah’ın bargir bedelinden Süleyman Ağa’da olan alacağını tahsil etmesi Canbaz tâifesinden bâ‘isü’l-kitâb el-Hâc Ahmed b. Abdullah nâm kimesne mahmiye-i İstanbul’da meclis-i şer‘-i hatîrde Süleyman Ağa b. Abdullah nâm kimesne mahzarında üzerine da‘vâ ve takrîr-i kelâm edip mezbûr Süleyman Ağa zimmetinde târîh-i kitâbdan iki ay mukaddem yedimden iştirâ ve kabz eylediği evsâfları beynimizde ma‘lûm on re’s bargir semeninden yüz altmış beş guruş hakkım olup meblağ-ı merkūmun yüz guruşunu bundan akdem mezbûr Süleyman Ağa yedinden ahz u istifâ ve mâ‘adâ zimmetinde altmış beş guruş hakkım kalıp hattâ mezbûr Süleyman Ağa cihet-i mezkûreden bana yüz altmış beş guruş deyni olduğunu huzûr-ı Müslimînde ikrâr ve işhâd dahi etmiş iken hâlâ meblağ-ı bâkī-i mezbûr altmış beş guruşu mezbûr Süleyman Ağa’dan taleb eylediğimde bana edâdan imtinâ‘ eder, suâl olunup alıverilmek matlûbumdur dedikde, gıbbe’s-suâl ve akībe’l-inkâr müdde‘î-i mezbûrdan müdde‘âsına beyyine taleb olundukda udûl-i Müslimînden ve mahmiye-i mezbûrede Manisalı Çelebi mahâllesi ahâlîsinden el-Hâc Ali b. İbrahim ve Mustafa b. Ahmed ve Mustafa b. Hüseyin ve el-Hâc İlyas mahâllesinden Mehmed b. Mustafa nâm kimesneler [71b] li-ecli’ş-şehâde meclis-i şer‘e hâzirûn olup istişhâd olunduklarında fi’l-hakīka işbu mezbûr Süleyman Ağa bundan [akdem] müdde‘î-i mezbûr el-Hâc Ahmed’den iştirâ ve kabz etdiğim evsâfı beynimizde ma‘lûm on re’s bargir semeninden mezbûr el-Hâc Ahmed’e zimmetimde lâzımü’l-edâ ve vâcibü’l-kazâ yüz altmış beş guruş deynim vardır deyü bizim huzûrumuzda ikrâr ve bizi işhâd dahi eyledi, müdde‘î-i mezbûr için kabzını mu‘terif olduğu yüz guruşdan mâ‘adâ altmış beş guruşu dahi mezbûr Süleyman Ağa’dan hakk-ı taleb ve ahz vardır biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm mâ-vaka‘a <> bi’t-taleb ketb olundu. Fi’l-yevmi’l-âşir min-şehri Rebî‘i’l-âhir sene sitte aşere ve mi’e ve elf. Şuhûdü’l-hâl: Es-Seyyid Hüseyin b. Mehmed, Mustafa b. Hasan, Ahmed Beşe b. Abdullah, Mehmed Çelebi b. Mustafa.