Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 309 Hüküm no: 275 Orijinal metin no: [71a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mirascılarının Abdurrahman Efendi’den intikal eden ve Yuvan v. Foçi’de olan alacaklarının tahsili Mahmiye-i İstanbul’da Karagümrük kurbünde Kurd Ağa mahâllesinde sâkin iken bundan akdem vefât eden es-Seyyid Abdurrahman Efendi b. ( ) nâm kimesnenin verâseti sulbiye kebîre kızları Rukıye ve Hadîce ve Sitti Nefise nâm hatunlara münhasıra olduğu şer‘an zâhir ve müte‘ayyin oldukdan sonra mezbûre Rukıye’nin zevci ve tarafından husûs-ı âti’l-beyana vekîl olduğu zât-ı mezbûreyi ma‘rifet-i şer‘iyye ile ârifân Abdülkerim b. Hüseyin ve Hasan b. Osman nâm kimesneler şehâdetleriyle şer‘an sâbit olan Mustafa Efendi b. Ahmed Efendi ve mezbûretân Hadîce ve Sitti Nefise taraflarından dahi husûs-ı âti’l-beyana vekîl olduğu zât-ı mezbûretânı kezâlik ma‘rifet-i şer‘iyye ile ârifân mu‘arrefân-ı mezbûrân Abdülkerim ve Hasan şehâdetleriyle sâbit olan mezbûre Hadîce’nin zevci el-Hâc Ali b. Ebubekir nâm kimesneler mahmiye-i mezbûrede meclis-i şer‘de Yuvan v. Foçi nâm zimmî muvâcehesinde her biri bi’l-vekâle üzerine da‘vâ ve takrîr-i kelâm edip müvekkilelerimiz mezbûrât Rukıye ve Hadîce ve Sitti Nefise’nin babaları müteveffâ-yı mezbûr es-Seyyid Abdurrahman Efendi’nin işbu temessük nâtık olduğu üzere cihet-i karz-ı şer‘îden mezbûr Yuvan zimmetinde yüz guruş hakkı olup meblağ-ı mezbûru müteveffâ-yı mezbûr, mesfûr Yuvan’dan kable’l-ahz ve’l-istîfâ vefât edip vâris-i şer‘le veresesine isâbet ve intikāl etmekle hâlâ meblağ-ı mezbûru mezbûr Yuvan’dan bi’l-vekâle taleb ederiz, suâl olunsun dedikde gıbbe’s-suâl mezbûr Yuvan cevâbında fi’l-hakīka müteveffâ-yı mezbûra ber-vech-i muharrer ve ber-mûceb-i temessük cihet-i mezbûreden zimmetinde yüz guruş deyni olduğunu ikrâr lâkin meblağ-ı mezbûrun yirmi sekiz guruşu ile bir zoltasını müteveffâ-yı mezbûra hayâtında bi’d-defa‘ât def‘ ü teslîm ol dahi yedimden ahz u kabz edip zimmetinde ancak yetmiş bir guruş ile bir sülüs deynim bâkī kalmışdır deyü meblağ-ı mezbûrun yirmi sekiz guruş ile bir zoltasını def‘le mukābele edicek isre’l-istintâk ve’l-inkâr mezbûr Yuvan’dan def‘-i mezbûruna beyyine taleb olundukda ityân-ı beyyine için istimhâl etmeğin mehl-i şer‘î birle ba‘de’l-imhâl meblağ-ı bâkī-i mezbûr yetmiş bir guruş ile bir sülüsü alâ-mûcib-i i‘tirâfihî vekîlân-ı mezbûrâna edâ ve teslîme mezbûr Yuvan’a tenbîh olunup mâ-vaka‘a bi’t-taleb ketb olundu. Fî 9 min-şehri Rebî‘ülahir sene 1116. Şuhûdü’l-hâl: el-Hâc Mehmed Efendi el-kâtib, Veli Efendi kâtib, Ömer Efendi kâtib, Emin Mehmed Efendi kâtib, Mustafa Efendi kâtib, el-Hâc Yusuf muhzır, Sarrâc Mehmed Çelebi.