Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 308 Hüküm no: 274 Orijinal metin no: [71a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Ahmed’in boşandığı eşi Mahmud Çelebi’den mehrini tahsil etmesi Mahmiye-i İstanbul’da Çıkrıkçı Kemâl mahâllesinde sâkine olup zâtı Ahmed b. Ali ve Ali b. Hamza nâm kimesneler ta‘rîfleriyle mu‘arrefe olan Fâtıma bt. Ahmed nâm hatun mahmiye-i mezbûrede meclis-i şer‘de sâbıkā zevc-i mutallıkı olan işbu ba‘isü’l-vesîka Mahmud Çelebi b. Mehmed Efendi mahzarında ikrâr ve takrîr-i kelâm edip mezbûr Mahmud Çelebi bundan esbak zevcim olup beni tatlîk etmekle zimmetinde mütekarrir ve ma‘kūdün-aleyh olan iki bin akçe mehr-i müeccelim ve hakkımın bin sekiz yüz akçesini işbu meclis-i şer‘de bana def‘ ü teslîm, ben dahi yedinden ba‘de’l-ahz ve’l-kabz mehr-i müeccelimden bâkī iki yüz akçeye ve hukūk-ı zevciyete ve sâir beynimizde cereyân eden ahz u i‘tâ ve mu‘âmelât-ı şettâya müte‘allıka da‘vâdan mezbûr Mahmud Çelebi’nin ve babası işbu hâzır bi’l-meclis Mehmed Efendi’nin zimmetlerini ibrâ ve iskāt eyledim dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 10 min-Rebî‘ülâhir sene 1116. Şuhûdü’l-hâl: Ali Çavuş b. Hamza, İsmail Efendi el-kâtib, Veli Efendi el-kādı, Mehmed Emin Efendi el-kādı, Ahmed b. Ali, Mehmed b. Ömer, el-Hâc Yusuf b. Osman.