Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 307 Hüküm no: 273 Orijinal metin no: [70b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullah Hatun’a babası ve kardeşinden intikal eden menzil ve müştemilatı ile içinde bulunan eşyada olan hissesini Süleyman b. Mahmud’a satması Medîne-i Üsküdar nevâhîsinden Kaymas nâhiyesine tâbi‘ Araman nâm karye sükkânından iken bundan akdem fevt olan Osman b. Murad nâm kimesnenin verâseti zevce-i metrûkesi Şerîfe Hadîce ile sulbî oğlu İbrahim’e ve sulbiye kebîre kızı Emetullah nâm hatuna münhasıra olup kable’l-kısme mezbûr İbrahim dahi fevt olup anası mezbûre Hadîce ile li-ümmin er karındaşı Mustafa’ya ve li-ebeveyn kız karındaşı mezbûre Emetullah’a münhasıra ve tashîh-i meseleleri yüz yirmi sehmden i‘tibâr olunup bi-hükmi’l-münâsaha sihâm-ı mezbûreden yirmi dokuz sehmi mezbûre Hadîce’ye ve on dört sehmi merkūm Mustafa’ya ve yetmiş yedi sehmi mezbûre Emetullah’a isâbet eyledikden sonra mezbûre Emetullah tarafından husûs-ı âti’l-beyana vekîl olduğu Süleyman b. Ahmed ve Selim b. Hasan nâm kimesneler şehâdetleriyle şer‘an sâbit olan Seyyid Mustafa b. Mehmed nâm kimesne mahmiye-i İstanbul’da meclis-i şer‘de bâ‘isü’l-vesîka Süleyman b. Mahmud nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûra babası müteveffâ-yı mezbûr Osman ile karındaşı merkūm İbrahim’den müntakil mülk-i mevrûsu olup karye-i mezbûrede vâki‘ bir tarafdan Burnaz Mehmed menzili ve bir tarafdan Okçuoğlu mülkü ve bir tarafdan harman yeri ve bir tarafdan tarîk-i âm ile mahdûd bir bâb çatma oda ve bir anbar ve bir mikdâr bahçe ve harman yerini müştemil menzilden ve menzil-i mezbûrun içinde mevcûd bir kazgan ve bir alaca kilim ve iki re’s inek ve bir re’s karasığır öküzü ve bir re’s düvede tashîh-i mezbûr olan hisse-i ırsiyesini müşterî-i merkūm Süleyman tarafından bi’l-îcâb ve’l-kabûl bey‘-i kat‘î ile on dört guruşa bey‘ ve temlîk ol dahi ber-vech-i muharrer iştirâ ve temellük ve kabûl eyledikden sonra semeni olan meblağ-ı mezbûr on dört guruşu merkūm Süleyman bana def‘ ü teslîm ben dahi yedinden ahz u kabz eyledikden sonra mahâllinde zabta ve kabza merkūmu taslît eyledim [71a] dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin min-Rebî‘i’l-âhir sene sitte aşere ve mi’e ve elf. Şuhûdü’l-hâl: Veli Efendi el-kādı, Süleyman Çelebi b. Mehmed, Ebubekir b. Ali, Mehmed Çelebi b. Ali, Abdullah Çelebi b. Abdullah, Sunullah b. Ahmed.