Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 312 Hüküm no: 279 Orijinal metin no: [72a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çobcan v. Karabet’in vefat eden Dimitri v. Kosta’da olan alacağını kefili Yuvan v. Kosta’dan tahsil etmesi Mahmiye-i İstanbul’da Vâlide Hanı’nda sâkin tüccâr tâifesinden işbu bâ‘isü’s-sifr Çobcan v. Karabet nâm zimmî mahmiye-i mezbûrede meclis-i şer‘de vilâyet-i Rumeli’nde Tırnovi kazâsına tâbi‘ Arnavud karyesi ahâlîsinden olup erbâb-ı ticâretden olmağla vilâyet-i Leh’de ticâret üzere iken bundan akdem hâlik olan Dimitri v. Kosta v. Kopo nâm zimmînin verâseti zevce-i metrûkesi Todora bt. Yako ile sulbiye kızı Keraste’ye ve li-ebeveyn er karındaşı Yuvan nâm zimmîye münhasıra olduğu şer‘an zâ[hir] ve müte‘ayyin oldukdan sonra hâlik-i mezbûrun metrûkâtına bi’l-verâse vâzı‘ü’l-yed olan karındaşı mezbûr Yuvan muvâcehesinde üzerine da‘vâ ve takrîr-i kelâm edip hâlik-i mezbûr Dimitri’ye Leh’e gider oldukda hayâtında zikr olunan Vâlide Hanı’nda şuhûd mahzarında malımdan üç bin guruş ikrâz ve teslîm ve adedi beynimizde ma‘lûm kırmızı bezimi dahi beş yüz guruşa bey‘ ve teslîm ol dahi ber-vech-i muharrer iktirâz ve kabz ve ibrâ ve tesellüm edip bu vech üzere zimmetinde cem‘an bana üç bin beş yüz guruş vâcibü’l-edâ ve lâzımü’l-kazâ deyni olup ve meblağ-ı mezbûr üç bin beş yüz guruşdan mezbûr Yuvan dahi emr u kabûlü hâviye kefâlet ile kefil olmağın mezbûr Dimitri <> meblağ-ı mezbûru bana kable’l-edâ varıp diyâr-ı Leh’de hâlik olmuşdur, hâlâ karındaşı mezbûr Yuvan’a suâl olunup meblağ-ı mezbûr hâlik-i mezbûrun terekesinden bana edâ etmek üzere tenbîh olunmak matlûbumdur dedikde, gıbbe’s-suâl mezbûr Yuvan cevâbında karındaşı hâlik-i mezbûrun terekesine bi’l-verâse vaz‘-ı yedini ikrâr lâkin deyn-i mezbûru bi’l-külliye inkâr edicek müdde‘î-i mezbûrdan müdde‘âsını mübeyyine beyyine taleb olundukda zikr olunan Vâlide Hanı’nda sâkin tâife-i merkūmeden Makdisi Körki v. Yanaki ve Makdisi Karabet v. Avanos ve Toksi v. Dimitri nâm zimmîler li-ecli’ş-şehâde meclis-i şer‘e hâzırân olup istişhâd olunduklarında fi’l-hakīka hâlik-i mezbûr Dimitri v. Kosta v. Kopo hayâtında zikr olunan Vâlide Hanı’nda işbu müdde‘î-i mezbûr Çobcan’dan üç bin guruş ikrâz ve kabz ve beş yüz guruşluk dahi kırmızı bez bizim huzûrumuzda iştirâ ve tesellüm ve kabz edip mezbûr Yuvan dahi meblağ-ı mezbûre emr u kabûlü hâviye kefâlet ile kefil olmuş idi. Biz bu vech üzere müdde‘-i mezbûrun hâlik-i mezbûr Dimitri zimmetinde üç bin beş yüz guruş hakkı olduğuna şâhidiz, şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de-ri‘âyeti şerâiti’l-kabûl şehâdetleri makbûle olmağın müdde‘î-i mezbûr tahlîf-i şer‘î ile tahlîf olundukdan sonra mûcebince ba‘de’l-hükm meblağ-ı mezbûr üç bin beş yüz guruşu tereke-i hâlik-i mezbûrdan müdde‘-i mezbûra edâ ve teslîme merkūm Yuvan’a tenbîh olundukdan sonra müdde‘î-i mezbûr Çobcan meclis-i şer‘de yine merkūm Yuvan muvâcehesinde i‘âde-i kelâm edip ânifen edâsına tenbîh olunan meblağ-ı [mezbûr] üç bin beş yüz guruşu mezbûr Yuvan tereke-i hâlik-i mezbûrdan tamâmen bana teslîm ben dahi yedinden ahz u kabz eyledim min-ba‘d meblağ-ı mezbûrdan mezbûr Yuvan zimmetinde ve hâlik-i mezbûrun sâir veresesi zimmetlerinde bir akçe ve bir habbe kalmadı dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin min-şehri Rebî‘i’l-âhir sene sitte aşere ve mi’e ve elf. Şuhûdü’l-hâl: el-Hâc Mehmed Efendi el-kādı, Ömer Efendi kâtib, Emin Mehmed Efendi kâtib, Muzlim el-Hâc Hüseyin b. ( ) Mehmed Efendi el-kādı, el-Hâc Yusuf b. ( ), Sahak Bazergân, Efnedol Bazergân, Mabşa Yano Bazergân, Görgi Bazergân.