Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 313 Hüküm no: 280 Orijinal metin no: [72a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ohan v. Mardıros’un Hacı Ahmed b. Hacı Ferhad’da olan alacağının tahsil olunması Sarrâf tâifesinden işbu râfi‘ü’s-sifr Ohan v. Mardıros nâm zimmî mahmiye-i İstanbul’da meclis-i şer‘de el-Hâc Ahmed b. el-Hâc Ferhad nâm kimesne mahzarında üzerine da‘vâ ve takrîr-i kelâm edip mezbûr el-Hâc Ahmed zimmetinde işbu yedimde olan memhûr temessük nâtık olduğu üzere cihet-i karz-ı şer‘îden bin beş yüz guruş hakkım olup meblağ-ı mezbûrun bi’d-defa‘ât mezbûr el-Hâc Ahmed yedinden dokuz yüz doksan yedi guruş üç rub‘unu ahz u istîfâ edip zimmetinde beş yüz otuz iki guruş bir rub‘ hakkım bâkī kalmağla hâlâ meblağ-ı bâkī-i mezbûru merkūm el-Hâc Ahmed’den taleb ederim, suâl olunsun dedikde gıbbe’s-suâl el-Hâc Ahmed cevâbında fi’l-hakīka müdde‘î-i mezbûrun yedinde kendi memhûr temessükü mûcebince cihet-i karz-ı şer‘îden kabzını i‘tirâf eylediği meblağ-ı mezbûrdan bâkī beş yüz otuz iki guruş bir rub‘ zimmetinde vâcibü’l-edâ ve lâzımü’l-kazâ deyni olduğunu ikrâr u i‘tirâf etmeğin, [72b] alâ-mûcib-i i‘tirâfihî meblağ-ı bâkī-i mezbûr beş yüz otuz iki guruş bir rub‘u müdde‘î-i mezbûr Ohan’a edâ ve teslîme merkūm el-Hâc Ahmed’e tenbîh olunup mâ-vaka‘a bi’t-taleb ketb olundu. Fi’l-yevmi’s-sâdis min-şehri Rebî‘ülâhir sene 1116. Şuhûdü’l-hâl: Hüseyin Efendi b. Himmet, el-Hâc Mehmed Efendi el-kâtib, İsmail Efendi el-kâtib, Sarrâc Mehmed Beşe b. ( ).