Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 313 Hüküm no: 281 Orijinal metin no: [72b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdi Beşe’nin çalınan parasını geri alması İstanbul’da Ayasofya-i kebîr mahâllesi ahâlîsinden işbu râfi‘ü’l-vesîka Abdi Beşe b. Receb mahmiye-i mezbûrede meclis-i şer‘de Mustafa b. Receb mahzarında üzerine da‘vâ ve takrîr-i kelâm edip işbu mezbûr Mustafa sekiz seneden beri mahâlle-i mezbûrede menzilimde sâkine olmağla menzil-i mezbûrda mahfûz olan sepedimin kilidin açıp içinden bir kesede mühürlü olan iki yüz elli guruşumu ahz ve masârıfına sarfla istihlâk edip meblağ-ı mezbûru ber-vech-i muharrer ahz u kabz ve masârıfına sarfla istihlâk eylediğini huzûr-ı Müslimînde ikrâr u i‘tirâf dahi etmeğin suâl olunup meblağ-ı merkūmun alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsına beyyine taleb olundukda udûl-i Müslimînden ve mahmiye-i mezbûrede Avcıbey mahâllesi ahâlîsinden Ahmed Çelebi b. Yahya ve hadîka-i hâssa Mehmed Bey b. Hasan li-ecli’ş-şehâde mahfil-i şer‘a hâzırân olup isre’l-istişhâd fi’l-vâki‘ işbu mezbûr Mustafa müdde‘î-i mezbûr Abdi’nin sepedinden mühürlü kese ile iki yüz elli guruşunu ahz u kabz ve masârıfına sarfla istihlâk eylediğini bizim huzûrumuzda ikrâr u i‘tirâf eyledi, biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye etdikde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm meblağ-ı mezbûr iki yüz elli guruşu müdde‘î-i mezbûra edâ ve teslîme merkūm Mustafa’ya tenbîh olunup mâ-vaka‘a bi’t-taleb ketb olundu. Fi’l-yevmi’t-tâsi‘ min-şehri Rebî‘i’l-âhir sene sitte aşere ve mi’e ve elf. Şuhûdü’l-hâl: İbrahim Efendi b. Kenan el-müezzini’l-Müzekkî, Veysel Ağa el-müzekkî, Kayyûm Abdullah el-müzekkî, Ali Efendi b. Abdurrahim, Mustafa Efendi b. Ali Efendi, Ali Efendi b. Ahmed Efendi, İbrahim Çelebi b. Abdülbaki, el-Hâc Yusuf b. Abdullah.