Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 160 Hüküm no: 219 Orijinal metin no: [52a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Hüsam Reis b. Abdullah’ın, kölesi Yusuf’u beş yıl oğullarına hizmet edip azat olması için anlaştığı (mükâtebe) Mahmiye-i Galata hâricinde Kasımpaşa mahallâtında Tahtakadı mahallesinde fevt olan merhûm Hüsam Reis b. Abdullah’ın işbu orta boylu, açık kaşlı, gök elâ gözlü, Rûsiyyü’l-asl Yusuf nâm gulâm meclis-i şer‘de müteveffâ-yı mezbûrun tenfîz-i vesâyâ-yı mu‘ayyenesine vasiyy-i muhtâr olan zevcesi Fâtıma bt. Abdullah mahzarında takrîr-i da‘vâ eyleyip müteveffâ-yı mezbûr efendim hâl-i hayâtında oğullarına beş yıl hizmet eylemek üzre beni kitâbetine kesmişdir hâlen kıbel-i şer‘den temessük taleb eylerim dedikde gıbbe’s-suâl ve’l-inkâr ve’l-istişhâd es-Seyyid Ali b. es-Seyyid Ahmed ve Perviz b. Abdullah nâm kimesneler meclis-i şer‘a li ecli’ş-şehâde hâzırân olup fi’l-vâki‘ müteveffâ-yı mezbûr oğullarına beş yıl hizmet edip âzâd olsun dedi biz şâhidiz şehâdet dahi eyleriz dediklerinde şehâdetleri ba‘de ri‘âyeti şerâiti’l-kabûl hayyiz-i kabûlde vâki‘ olup bu vesîka-i enîka ketb ve imlâ olunup yed-i tâlibe vaz‘ olundu ki lede’l-hâce müzekkir-i mâ cerâ ola. Tahrîren fî Zilhicce sene 998. Şuhûdü’l-hâl: eş-Şuhûdü’s-sâbikūn.