Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 161 Hüküm no: 221 Orijinal metin no: [52b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Abdullah’tan, kız kardeşi Âişe’ye düşen ev hissesinin Âişe’nin ölümüyle beytülmal emini tarafından Behram Ağa b. Abdülmennân’a satıldığı Oldur ki Mahmiye-i Galata’da ve tevâbi‘inde hâlâ beytülmâlü’l-hâssa emîni olan fahrü’l-emâsil ve’l-akrân Musa Çavuş b. Kaya ve şerîki Hasan Bey b. Abdullah ve kâtibi Ali Çelebi b. Mustafa meclis-i şer‘-i şerîfde işbu hâmilü’l-kitâb kıdvetü’l-emâsil ve’l-akrân Behram Ağa b. Abdülmennân mahzarında bi tav‘ihim ikrâr ve i‘tirâf eyleyip dediler ki hâric-i Galata’da Beşiktaş mahallâtında Câmi‘ mahallesinde müteveffât olup muhallefâtına vâzı‘ü’l-yed olduğumuz Fâtıma bt. Abdullah nâm müteveffânın zevci müteveffâ olan Rıdvan Bey b. Abdullah’dan olan kız karındaşı Âişe’ye müteveffât-ı merkūmun mahalle-i mezbûrede vâki‘ olup hudûdunun bir tarafı tarîk-i ammâ ve iki cânibi merkūm Hayreddin Paşa Evkāfı’na ve bir tarafı Yahşi Çelebi mülüküne müntehî olan bir selâmlığı ve iki karşı odaları ve bir sofa ve iki yer evlerin ve dehlizi ile ve hamamı ve matbahı ve bahçeyi ve eşcâr-ı müsmire ve gayrı müsmiresiyle ve muhavvatayı ve kenîf ve fırını müştemil olan menzilden değen hisseden mezbûre Fâtıma’ya südüs hisse değip mezbûre Fâtıma dahi fevt olup gayrı vârisi olmamağla muhallefâtına vâzı‘ü’l-yed olup mîrîye âid olmakile zikr olunan menzil sûk-ı sultânîde bey‘-i men yezîd olup cümle iki yüz bin akçeye karâr edip merkūme Behram Ağa’dan gayrı âhar ziyâde eder tâlib ve râgıb bulunmayıp mezbûre Fâtıma’ya değen südüs hisse iki yüz bin akçe hesâbından merkūm Behram Ağa’ya otuz üç bin akçeye bey‘ eyleyip meblağ-ı merkūm otuz üç bin akçe mezbûreye âid olup kabz eyleyip südüs hisse mezbûr Behram Ağa’ya teslîm eyledi dediklerinde mukırrûn-ı mezbûrûn Musa Çavuş ve Hüseyin Bey ve Ali Çelebi’nin vech-i meşrûh üzre ikrârlarına mukarrun lehü’l-merhûm Behram Ağa tasdîk edip zikr olunan menzilden südüs hisseden ki otuz üç bin akçe olur iştirâ eyledim dedikde ve sıhhat ve bey‘ u şirâya ve ikrâra ve tasdîka hükm olunup bu vesîka ber sebîl-i temessük ketb olunup [53a] yed-i tâlibe vaz‘ ve def‘ olundu ki lede’l-hâce ihticâc oluna. Cerâ zâlike ve hurrire fî evâili Zilhicce min şühûri sene semânîn ve tis‘în ve tis‘a mi’e.