Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 263 Hüküm no: 410 Orijinal metin no: [93a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Melekpir Ahmed’in, ölen Mehmed Bey’den alacaklı olduğu Oldur ki Mustafa b. Melekpir Ahmed tarafından husûs-ı âti’z-zikre ve kabza Abdürrezzak b. İlyas ve Şeyh Ebûbekir b. el-Hâc Yusuf şehâdetleriyle vekâleti sâbite olan el-Hâc Nasuh b. Memi meclis-i şer‘a bundan akdem mir-livâ-i Biga olup fevt olan merhûm Mehmed Bey’in li eb ve üm karındaşı olup merhûmun sulbiyesi olan Belkıs nâm sagīre silk-i kıbel-i şer‘den vasîsi olan Safiye Hâtun tarafından merhûm-ı mûmâ-ileyhin menkûhalarından Hatice ve Fâtıma nâm hâtunlar taraflarından alâ nehci’ş-şer‘î vekâleti sâbite olan fahrü’l-akrân İbrahim Çavuş b. Mustafa nâm kimesneyi ihzâr ve mahzarında takrîr-i kelâm kılıp merhûm-ı mezbûra murâbaha tarîk[i] üzre on dört bin akçe verip hâlâ fevt olup zimmetinde kalmağın merkūm İbrahim Çavuş meblağ-ı merkūmu ve ribhini taleb ederim dedikde gıbbe’s-suâl ve’l-inkâr beyyine taleb olmağın udûl-i müslimînden Şeyh Ebûbekir b. el-Hâc Yusuf ve Ahmed b. Bâli li ecli’ş-şehâde hâzırân olup mezkûrun da‘vâsına muvâfık edâ-i şehâdet-i şer‘iyye edip merhûm-ı mezbûr Mehmed Bey, mir-livâ-i Biga oldukda bizim yanımızda mezkûr Nasuh’u vekîl eden merkūm Mustafa’dan ribhin vermek üzre on dört bin akçe aldı hâlâ kendi vefât edip zimmetinde kaldı. Vech-i meşrûh üzre şâhidleriz ve şehâdet dahi ederiz dediklerinde hayyiz-i kabûlde vâki‘ olup bi’t-taleb tahrîr olundu. Tahrîren fî evâhiri şehri Ramazân sene 999. Şuhûdü’l-hâl: El-Hâc Hasan b. İbrahim el-Kayyım, fahrü’l-akrân Musa Çavuş b. Kaya, Kaytas Bey b. Abdullah, Hüsrev Bey b. Abdullah.