Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 264 Hüküm no: 412 Orijinal metin no: [93a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe’nin, babası Mehmed Reis b. Yunus’un terekesinden hissesini aldığı Budur ki Mahmiye-i Galata mahallâtından Kasımpaşa[’da] Câmi‘-i [Kebîr] mahallesi sâkinlerinden olup fevt olan merhûm Mehmed Reis b. Yunus nâm kimesnenin sulbiye kızı Âişe tarafından merhûm-ı mezkûrdan kendiye intikāl eden hissesini kabz ve îsâl ve sâir husûslarına Ali b. Mehmed ve diğer Ali b. İzzet şehâdetleriyle vekâleti sâbite olan zevci Davud b. İbrahim nâm kimesne meclis-i şer‘-i şerîfe müteveffâ-yı mezkûrun oğlu Mustafa tarafından nehc-i şer‘î üzre vekâleti sâbite olan işbu hâmilü’l-kitâb Mustafa b. Mehmed mahzarında ikrâr ve i‘tirâf edip merhûm-ı mezkûrun [93b] düyûn-ı müteferrikası zevceleri Nâzperver ve Hatice nâm hâtunların mehr-i müeccelleri ihrâc olundukdan sonra merhûm-ı mezbûrun muhallefâtından vereseleri olan sulbî oğlu Mustafa ve sabiyye kızları Sâkine ve Esmâ ve müvekkilem Âişe’ye ve mezbûretân zevcelerine nukūd-i mezkûrdan yüz on beş bin akçe intikāl eylemişdir. Zikr olunan muhallefâtdan Âişe’nin hisse-i şer‘iyyesi yirmi bin yüz yirmi beş akçe olmuş idi. Zikr olunan hissesi mukābelesinde merhûm-ı merkūmun mahalle-i Suyolcu’da? olan ma‘lûmetü’l-hudûd müstağnî ani’t-tahdîd evi on altı bin akçeye tutulup ve dört bin yüz yirmi beş akçesini müteveffâ-yı mezbûrun sulbî oğlu Mustafa’nın vekîli olan mezkûr Mustafa Çelebi’den alıp, kabz ve tesellüm eyledim. Müvekkile Âişe’nin babası merhûm Mehmed Reis’den kendiye âid ve râci‘ olan hissesini bi’t-tamâm ve’l-kemâl ber mûceb-i defter-i kassâm-ı sâbık kabz edip verese zimmetinde mezkûr Âişe’nin bir akçe ve bir habbesi kalmamışdır deyicek mukırr-ı mezkûrun vech-i meşrûh üzre ikrârın vekîl-i mesfûr Mustafa Çelebi tasdîk eyledikden sonra vesîka-i enîka hüve’l-hakīka ketb-i kütüb ve terkīm olunup ber sebîl-i temessük yed-i tâlibine vaz‘ ve def‘ olundu ki lede’l-hâce müzekkir-i mâ cerâ olup vakt-i hâcetde ihticâc edine. Cerâ zâlike ve hurrire fî evâhiri şehri Şevvâli’l-mu‘azzam min şühûri li sene 999. Şuhûdü’l-hâl: El-Hâc Hüseyin b. Abdullah ve el-Hâc Piyâle b. Abdullah ve Abdülkādir b. Hamza min mahalle-i Câmi‘-i Kebîr el-Müezzin ve Derviş b. Abdullah el-Müezzin ve Abdülkerim b. Mehmed el-İmâm ve el-Hâc Mehmed b. Abdullah ve Cafer b. Abdullah ve Mehmed b. Kasım ve Mehmed b. Hüsrev ve Mehmed b. Hasan el-Müezzin.