Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 265 Hüküm no: 413 Orijinal metin no: [93b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey b. Mustafa Bey’in, ölen Mehmed Bey’den karz-ı hasen tarikiyle alacaklı olduğu Bundan akdem mir-livâ-i Biga olup fevt olan merhûm Mehmed Bey’in sagīre kızı Belkıs’a kıbel-i şer‘den vasîsi Safiye Hâtun bt. Abdi Bey tarafından nehcü’ş-şer‘î üzre vekâleti sâbite olan İbrahim Çavuş b. Mustafa Bey ve zümre-i zu‘amâdan işbu hâmilü’l-kitâb Mehmed Bey b. Mustafa Bey meclis-i şer‘-i şerîfe hâzırân olduklarında çavuş-ı merkūm mahzarında Mehmed Bey mesfûr takrîr-i kelâm ve tafsîl-i merâm kılıp bundan akdem merhûm-ı mezbûr Mehmed Bey’in zimmetinde karz-ı hasen tarîkiyle dokuz bin beş yüz akçe hakkım olup müteveffâ-yı mezkûrdan zikr olunan meblağdan altı bin yüz akçesin alıp kabz edip müteveffâ-yı mezbûr zimmetinde üç bin dört yüz akçe hakkım bâkī kalmışdır taleb ederim dedikde müdde‘î-i mezkûrun da‘vâsına muvâfık beyyine taleb olundukda udûl-i müslimînden Mustafa b. Sinan ve Mehmed [b.] Cafer bi’l-muvâcehe edâ-i şehâdet edip fi’l-vâki‘ işbu Mehmed Bey’in müteveffâ-yı mesfûr Mehmed Bey’in zimmetinde dokuz bin beş yüz akçesi olup dokuz bin beş yüz akçeden altı bin yüz akçesi edâ olunup üç bin dört yüz akçesi olup zimmetinde lâzımü’l-edâ bâkī kalmışdır bu husûsa şâhidleriz ve şehâdet dahi ederiz dediklerinde ba‘de’t-tezkiyye ve’t-ta‘dîl şehâdetleri hayyiz-i kabûlde vâki‘ oldukdan sonra müdde‘î-i mezkûr Mehmed Bey [94a] zikr olunan üç bin dört yüz akçeyi almayıp hâlâ zimmetinde bâkī kaldığına yemîn teklîf olundukda yemîn billâh edip müteveffâ-yı mezkûrun muhallefâtından meblağ-ı mezbûrun edâsına hükm olunup bu vesîka-i enîka alâ mâ hüve’l-hakīka ketb olunup yed-i tâlibine vaz‘ olundu. Tahrîren fî evâili şehri Şevvâli’l-mu‘azzam li sene tis‘a ve tis‘în ve tis‘a mi’e. Şuhûdü’l-hâl: İskender Bey b. Ali, Mahmud b. Behram Bey, Süleyman Bey b. Abdullah, Mustafa Bey b. Sinan, Mehmed Çelebi b. Cafer.