Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 286 Hüküm no: 448 Orijinal metin no: [102b-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Martinoz’un İlyas Çelebi’nin vârisi olduğu Sebeb-i tahrîr-i hurûf ve inhâsı ve bâ‘is-i tastîri ve inşâ oldur ki Udûlden Serfiçe kasabası mahallâtından Debbâğlar mahallesinde sâkin olan Ferhad b. Kılıç ve yine kasaba-i mezbûre mahallâtından Enver mahallesinden Hasan b. Abdurrahman nâm kimesneler cerh ve ta‘dîl mahallinde nakil ve tahvîl maksadıyla meclis-i şer‘a hâzırân olup hâmil-i hâze’l-kitâb Mehmed er-Râcil b. Martinoz b. Dimo b. Masturaki’den sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki, müdde‘î-i mezkûr Mehmed, medîne-i mahmiye-i Galata’da bundan akdem fevt olan ve muhallefâtı Kamer bt. Abdullah nâm annesi tarafından zabt edilen İlyas Çelebi b. Mehmed Çelebi Reis b. el-Hâc Maksud b. Ahmed b. Masturaki nâm sabînin usûbet-i nesebiyye cihetiyle vârisidir. Şu cihetle ki, müdde‘î-i mezkûrun dedesi Dimo ve müteveffâ-yı merkūmun dedesi Ahmed ana baba bir karındaşdır. Babaları mezbûr Masturaki, anneleri zimmiye Maro’dur. Müdde‘î-i mezbûr, müteveffâ-yı mezkûrun babasının amca oğludur. Verâseti ona münhasırdır. Ondan başka vâris ve terekesine müstehık kimesne ma‘lûmumuz değildir. Şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mû‘teber oldu. Hakīkat-i hâl ve masdûkat-ı makāl gıbbe’t-taleb ve’s-suâl sultânü’l-ulemâ’i’l-izâm burhânü’l-fuzalâi’l-fihâm feridü asr lâ-yûced lehû misâl vahîdü dehr yudrab bi fezâilihî li emsâl fâtihu ebvâbi’l-me‘ânî bi miftâhi beyânihî kâşifü’l-esrâri’l-belâğa hâizü’l-fezâil ve’l-me‘âlî ve’l-mefâhir hâvî ezimmeti’l-ulûm fi’l-bâtın ve’z-zâhir câmi‘ü’l-fürû‘ ve’l-usûl sadru şerî‘ati’r-resûl mevlâ’l-mevâlî ale’l-ıtlâk hâkimü’l-cumhûr bi’l-istihkāk yani vilâyet-i Rumeli-i ma‘mûre kazaskerine ve usûl ve nüvvâbdan kitâb-ı mezbûr vâsıl olan hükkâm-ı zevi’l-ihtirâm kıbellerine inhâ olundu ki kabûl ile in‘âm ve medlûlü ile amel-i tâm edeler. Cerâ zâlike ve hurrire fî yevmi’t-tâsi‘ min şehri Şa‘bâni’l-mu‘azzam sene tis‘a ve tis‘în ve tis‘a mi’e sene 999. Şuhûdü’t-tarîk: Şah Çavuş b. Mustafa Ağa min çavuşân-ı Dergâh-ı âlî, Fâik Çelebi b. Haydar Bey İşbu vesîka-i sahîha-i şerîfe Serfiçe kadısı Derviş Ahmed b. Mehmed’in mecâlis-i şerîfe-i latîfelerine yazıldı. Ufiye anhümâ.