Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 287 Hüküm no: 449 Orijinal metin no: [103a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Erkek çocuklar gibi kız çocuklarına da dükkan ve mahzenlerin miras bırakılabileceği, evlat yoksa mülklerin vakıflara devri Hâzihî sûretün mutâbıkatün li aslihâ’l-hatîr. Ketebehü’l-abdü’l-fakīr Mehmed b. Mustafa el-müvellâ bi medîneti Kostantıniyyeti mahmiye hilâfeten akzâ kuzâti’l-müslimîn ve evlâ vülâti’l-muvahhidîn, ma‘denü’l-fazli ve’l-yakīn. Vâris-i ulûmü’l-enbiyâ’i ve’l-mürselîn. Hüccetü’l-hakkı ale’l-halki ecma‘în, el-muhtas bi mezîdi inâyeti’l-meliki’l-mu‘în. Mevlâna’l-hâkimi bi mahrûse-i İstanbul -dâmet fezâilühû- tevkī‘-i refî‘-i hümâyûnum vâsıl olucak ma‘lûm ola ki mahrûse-i İstanbul’da vâki‘ olan erbâb-ı hıref ve ahâlî-i dekâkîn Âsitâne-i sa‘âdetime gelip bundan akdem kendi malları ile dekâkîn ve mehâzin binâ edip veyâhud akçeleri ile satın alıp vefât ettiklerinde oğullarına ve kızlarına intikāl edip eytâma sebeb-i ma‘âş olurdu ba‘dehû kızlara dükkân ve mahzen verilmeye deyû mütevellîlere ahkâm-ı şerîfe verilmekle hâl-i hayâtlarında mülklerin ve dekâkîn ve mehâzin verenler vefât ettiklerinde yetîmleri şiddet-i ihtiyâcla muhtâce ve zelîle oldukların bildirip kızlarına dahi vermek bâbında istid‘â-yı inâyet ettiklerinde dokuz yüz yetmiş sekiz Cumâdelûlâsı’nın sekizinci gününde kızlarına dahi verilmek için hükm-i hümâyûn verildiğini bildirip tecdîd-i hükm-i şerîfim taleb eylemeğin buyurdum ki hükm-i şerîf-i vâcibü’l-etbâ‘ım vusûl buldukda emrim üzre eğer Ayasofya’dan ve sâir ecdâd-ı izâmım enârallâhu bürhânehum evkāfıdır ve eğer sâir evkāfa müte‘allik dekâkîn ve mehâzin ve kârgir binâ ve gayrıdır, onun gibi müste’cirleri vefât eylediklerinde oğullarına ve kızlarına icâre-i mu‘ayyene ile icâre ile verdirip mütevellîleri ol bâbda dahl ve ta‘arruz ettirmeyip müste’cirlerden fevt olup evlâdı kalmayanların dekâkîn ve mehâzin ve sâir evkāfa müte‘allik yerleri muktezâ-yı şer‘-i şerîf üzre vakıf tarafından zabt ve kabz ettirip şer‘-i şerîfe muhâlif hâricden kimesneye dahl ettirmiyesin ve bu emr-i şerîfimi sicill-i mahfûza kayd ettikden sonra ellerinde ibkā eyliyesin ki dâimâ mazmûn-ı hümâyûn ile amel oluna. Şöyle bilesin, alâmet-i şerîfe i‘timâd kılasın. Tahrîren fî evâsıtı şehri Cumâdelûlâ sene hams ve semânîn ve tis‘a mi’e. Be makām-ı Kostantıniyye