Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 293 Hüküm no: 457 Orijinal metin no: [105b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Bey b. Kasım’ın azat edildikten sonra ölen Raziye bt. Kara Süleyman adlı cariyenin mirasından hisse istediği Sebeb-i tahrîr-i kitâb-ı sıhhat nisâ[b oldur ki] Dergâh-ı âlî yeniçerilerinden Ahmed Bey b. Kasım nâm kimesne mahfil-i kazâda Üsküdar mahallâtından Sultantepesi mahallesinde fevt olan Râziye bt. Kara Süleyman nâm sagīrenin vasiyy-i muhtârı olan Mustafa Bey b. Abdullah nâm kapıcı mahzarında takrîr-i kelâm ve da‘vâ edip müteveffâ-yı mezbûrenin babası Cafer nâm kimesne benim babam Kasım’ın babası İskender nâm kimesnenin abd-i mu‘tak[ı]dır ol cihetden mezbûre Râziye’nin ben usûbet-i sebebiyle tarîki ile vârisiyim verâsetim hasebiyle müteveffât-ı merkūmenin muhallefâtından hisse-i şer‘iyyemi taleb ederim suâl olunsun gıbbe’s-suâl vasiyy-i mezbûr cevâb verip fi’l-vâki‘ müteveffât-ı mezbûrenin ceddi mezbûr Cafer’i müdde‘î-i mezbûrun ceddi İskender i‘tâk eylemişdir. Lâkin mezbûre Râziye’nin annesi Fâtıma ve annesinin annesi Âişe hürretü’l-asldır öyle olsa müdde‘î-i mezbûr müteveffât-ı merkūmeden vâris olmaz deyû fetvâ-yı şerîfe ibrâz edip mazmûn-ı münîfinde Hind fevt olup, li eb kız karındaşı Zeyneb’i ve babasını i‘tâk eden Zeyd’in oğlunun oğlu Bekir’i terk eylese, onlar da hürretü’l-asl ise Zeyneb nısfını farziyyet tarîki ile, nısf-ı âharı reddiyet tarîki ile alıp mezbûr Bekir’e bi hasebi’l-irs nesne âid olmaz buyrulmağın müteveffâ-yı mezbûrun annesi ve annesinin annesi hürretü’l-asl idiğine müdde‘î-i mezbûrdan beyyine taleb olundukda udûl-i müslimînden Davud b. Abdullah er-Râcil ve Sinan b. Abdullah er-Râcil nâm kimesneler meclis-i şer‘a hâzırân olup fi’l-vâki‘ mezbûre Râziye’nin annesi merkūme Fâtıma ve annesinin annesi merkūme Âişe hürretü’l-asldır husûs-ı mezkûre şâhidleriz, şehâdet dahi ederiz dediklerinde şehâdetleri hayyiz-i kabûlde vâki‘ oldukdan sonra mezbûr Ahmed Bey inân-ı da‘vâ ve semt-i âhara çekip fi’l-vâki‘ mezbûre Fâtıma ve merkūme Âişe hürretü’l-asldır lâkin Âişe annesi Gülşah ve mezbûre Gülşah’ın annesi Yasemin nâm hâtunlar mahmiye-i Kostantıniyye’de Hüsrev Paşa Türbesi kurbunda sâkin bir yayabaşının câriye-i mu‘takalarıdır eyle olsa müteveffât-ı mezbûreden usûbet-i sebebiyye tarîk[i] ile vâris olurlar deyip fetvâ-yı şerîfe ibrâz edip mazmûn-ı münîfinde Hind fevt olup kız karındaşı Zeyneb’i ve Zeyneb’in babasını i‘tâk eden Zeyd’in oğlunun oğlu Ömer’i terk ile Hind’in annesi ve annesinin annesi cemî‘an hürretü’l-asl olup lâkin annesinin annesi ve annesinin annesi cedde ki dördüncü dereceden cedde olan Hatice mu‘taka olsa nısfını Zeyneb’e ve nısfını Amr alır deyû buyrulmağın mezbûr Ahmed Bey’den da‘vâsına muvâfık beyyine taleb olundukda udûl-i müslimînden Sinan b. Mahmud ve Mustafa [b.] Mehmed ve Osman b. Mehmed nâm kimesneler meclis-i şer‘a li ecli’ş-şehâde hâzırûn olup fi’l-vâki‘ mezbûreteyn Gülşah ve annesi Yasemin mahalle-i mezbûrede sâkine mezbûr babasının mu‘takalarıdır vech-i meşrûh üzre şâhidleriz ve şehâdet dahi ederiz dediklerinde ba‘de’t-tezkiyye ve’t-ta‘dîl şehâdetleri hayyiz-i kabûlde vâki‘ olup mûceb-i fetvâ-yı şerîf ile hükm olunup mâ hüve’l-vâki‘ bi’t-taleb kayd olundu. Tahrîren fî evâhiri Safer min sene tis‘a ve tis‘în ve tis‘a mi’e. Şuhûdü’l-hâl: Mahmud b. Kasım, Ali b. Sinan, Ömer b. Ali, Musa b. İshak, Ali b. Bâli, Ali b. Mahmud, Mehmed Bey b. Ahmed, Behram b. Abdullah ve gayruhüm.