Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 58 Hüküm no: 24 Orijinal metin no: [3b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yunus Bey’in hastalığı sebebiyle vasîlikten çekildiği Sebeb-i tahrîr-i hurûf budur ki Bundan akdem mahmiye-i Galata hâricinde Müeyyedzâde mahallesinde sâkin iken vefât eden merhûm Yahya Bey b. Abdullah nâm râcilin sagīre kızı Havva’nın kıbel-i şer‘den vasiyy-i mansûbu olan Yunus Bey b. Abdullah nâm kimesne mahfil-i şer‘-i şerîfe mezbûrun zevcesi Cinân Hâtun bt. Hasan nâm hâtunu ihzâr ve mahzarında takrîr-i kelâm edip sagīre-i mezbûrenin vesâyetim hasebiyle müteveffâ-yı mezbûrdan irs-i şer‘le intikāl eden on bin akçe hisse-i şer‘iyyesini ba‘de küll-i hesâb alıp kabz etmiş idim el-hâletü hâzihî sâhib-i firâş olup hizmete kādir olmadığım ecilden meblağ-ı mezbûru merkūme Cinân Hâtun’a bi’t-tamâm ve’l-kemâl edâ ve teslîm eyleyip hizmet ve vesâyetden fâriğ oldum vâki‘ hâl merkūme Cinân Hâtun’a suâl olunup takrîr[i] tahrîr olunmasın taleb ederim dedikde gıbbe’s-suâl merkūme Cinân Hâtun cevâb verip fi’l-hakīka müteveffâ-yı mezbûr zevcim Yahya Bey’den irs-i şer‘le sagīre-i merkūmeye intikāl eden on bin akçe vesâyetim hasebiyle on sikkeyi alıp kabz eyledim min ba‘d merkūm Yunus Bey’de müteveffâ-yı mezbûrun muhallefâtından ve nakid akçeden zimmetinde bir akçe ve bir habbe bâkī kalmadı dedikde mukırra-i mezbûrenin vech-i meşrûh üzre olan kelimât-ı meşrûhasını mukarrun lehü’l-merkūm vicâhen ve şifâhen tasdîk ve tahkīk ettikden sonra mâ vaka‘a alâ vukū‘ihî bi’t-taleb ketb ve imlâ olundu. Tahrîren fi’l-yevmi’l-âşir min şehri Şa‘bâni’l-mu‘azzam sene hamse ve elf. Şuhûd: Ahmed b. el-Hâc Şaban, el-Hâc Hasan b. Abdullah, el-Hâc Bayram b. Abdullah, İlyas Bey b. Abdullah, Nebi b. Murad ve gayruhüm