Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 75 Hüküm no: 50 Orijinal metin no: [6b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud Bey’in muâmele-i şer‘iyyeden olan alacağını aldığı Mahmiye-i İstanbul’da Hoca Halil mahallesinde sâkin olup hâssa arabacılarından Mahmud Bey b. el-Hâc İbrahim meclis-i şer‘-i şerîfde bundan akdem Hazret-i Ebî Eyyûb el-Ensârî mahallâtından Kasım Çavuş mahallesinde sâkin olup sefer-i nusret-eserde vefât eden merhûm Hasan Bey b. Abdullah nâm kimesnenin sagīr oğlu Mehmed’in vasiyy-i şer‘îsi olan hâmilü’l-kitâb Mehmed Çelebi b. Yusuf mahzarında ikrâr ve takrîr-i kelâm edip eyitdi bundan akdem müteveffâ-yı mezbûrda mu‘âmele-i şer‘iyye tarîkile otuz üç bin akçe hakkım olup meblağ-ı mezbûru vasiyy-i mezbûr Mehmed Çelebi muvâcehesinde isbât edip müteveffâ-yı mezbûrun muhallefâtından meblağ-ı merkūm bana hükm olunmuş idi el-hâletü hâzihî meblağ-ı merkūmu vasiyy-i mezbûr Mehmed Çelebi’den bi’t-tamâm ve’l-kemâl ahz ü kabz edip bir akçe ve bir habbe bâkī hakkım kalmadı ba‘de’l-yevm benden asâleten ve vekâleten da‘vâ ve nizâ‘ sudûr [ve] zuhûr eder ise inde’l-hükkâm mesmû‘a ve makbûle olmaya dediklerinde mukırr-ı mezbûru ikrâr-ı meşrûhunda mukarrun lehü’l-mezbûr Mehmed Çelebi vicâhen tasdîk ve şifâhen tahkīk ettikde mâ hüve’l-vâki‘ alâ vukū‘ihî bi’t-taleb kayd olundu yed-i tâlibe vaz‘ olundu. Cerâ zâlike ve hurrire fi’l-yevmi’s-sâbi‘ ve’l-ışrîn min şehri Şa‘bâni’l-mu‘azzam sene hamse ve elf. Şuhûd: Seydi Mustafa b. Şaban, İbrahim b. Mehmed, Ramazan Çelebi b. Mehmed el-Hatîb, Mustafa b. Abdullah, Receb b. Halil ve gayruhüm