Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 83 Hüküm no: 62 Orijinal metin no: [8a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Ağa Vakfı’na ait dükkanın tasarruf hakkının devri Mahmiye-i Galata’da Hoca Ali mahallesinde sâkin Ahmed Çelebi b. Mehmed nâm kimesne kendi tarafından asâleten ve karındaşı Mahmud tarafından husûs-ı âti’z-zikri ikrâra el-Hâc Yusuf b. Abdullah ve Bâli b. Dursun şehâdetleriyle şer‘an vekâleti ve yine mahalle-i mezbûrede sâkin mezbûr Ahmed Çelebi’nin kız karındaşı Fâtıma Hâtun kıbelinden husûs-ı âti’z-zikri ikrâra mezbûrân şâhidler şehâdetleri ile vekâleti sâbite olan el-Hâc Yusuf b. Abdullah nâm kimesneler meclis-i şer‘de Hasan Çavuş b. Abdullah tarafından husûs-ı âti’z-zikri tasdîka vekîl-i şer‘îsi olan mevlânâ İsmail Halîfe b. Ali mahzarında ikrâr ve i‘tirâf edip bundan akdem mahalle-i mezbûrede vefât eden babamdan Mehmed nâm kimesne icâre-i mu‘accele ile mutasarrıf olduğu merhûm Mustafa Ağa vakfı’ndan Tophâne’de vâki‘ bir cânibi Hüseyin dükkânı ve bir cânibi Bölükbaşı dükkânı ve bir cânibi tekye ve bir cânibi tarîk-i âma müntehî olan vakıf dükkânın hakk-ı tasarrufunu mezbûr Hasan Çavuş’a yedi bin nakd-i râyic fi’l-vakt akçeye tefvîz edip mukābele-i tefvîzde meblağ-ı merkūmu vekîl-i mezbûrun yedinden bi’t-tamâm alıp kabz edip elân makbûzumdur dediğinde mukırr-ı merkūmun vech-i meşrûh üzre olan ikrârını vekîl-i merkūm bi’l-muvâcehe tasdîk ettikde mâ vaka‘a kayd şüd. Tahrîren fî 14 şehri’l-mezbûr. Şuhûdü’l-hâl: Abdülkādir Hoca b. Hacı, Receb Çelebi b. Abdullah, Şaban Bey b. Abdullah, Hızır b. Abdullah, Ahmed b. Hüseyin ve gayruhüm