Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 84 Hüküm no: 63 Orijinal metin no: [8a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahallenin avârız parasından ödünç verildiği Mahmiye-i Galata mahallâtından Câmi‘-i Kebîr mahallesinin avârız akçesine hâlen mütevellî olan mevlânâ İsa Halîfe b. Abdurrahman nâm kimesne meclis-i şer‘de mahalle-i mezbûrede sâkin iken vefât eden merhûm es-Seyyid Mehmed b. es-Seyyid İbrahim nâm kimesnenin sagīr oğlu Mehmed’in vasiyy-i muhtârı olan es-Seyyid Mehmed b. es-Seyyid Ahmed’i ihzâr ve mahzarında takrîr-i da‘vâ edip müteveffâ-yı mezbûrun zimmetinde avârız akçesinden üç bin akçe ve murâbahasından bir buçuk senede dört yüz elli akçe cem‘an üç bin dört yüz elli akçe müteveffâ-yı mezbûrun zimmetinde bâkī kalmışdır taleb ederim suâl olunsun dedikde gıbbe’s-suâl vasiyy-i merkūm husûs-ı mezbûru inkâr ile cevâb vericek müdde‘î-i merkūmdan sıdk-ı makāline beyyine taleb olundukda udûl-i müslimînden Mehmed Çelebi b. Yusuf el-Mu‘arrif ve Hasan Halîfe b. Abdurrahman nâm kimesneler li ecli’ş-şehâde meclis-i şer‘a hâzırân olup istişhâd olundukda edâ-i şehâdet-i şer‘iyye ettiklerinde şehâdetleri hayyiz-i kabûlde vâki‘ olup şehâdet-i şer‘iyye edip fi’l-vâki‘ müteveffâ-yı mezbûrun mahalle-i mezbûre avârız akçesinden üç bin akçe ve bir buçuk sene murâbahasından dört yüz elli akçe ki cem‘an üç bin dört yüz elli akçe eder müteveffâ-yı mezbûrun zimmetinde bâkī kalmışdır lâzımü’l-edâ deyndir biz bu husûsa şâhidleriz şehâdet-i şer‘iyye dahi ederiz dediklerinde ba‘de’t-ta‘dîl ve’t-tezkiyye hayyiz-i kabûlde vâki‘ oldukdan sonra müteveffâ-yı [mezbûrun] muhallefâtından meblağ-ı mezbûrun edâsına hükm olunup mâ vaka‘a kayd şüd. Tahrîren fî evâili şehri Ramazâni’l-mübârek sene hamse ve elf. Şuhûd: El-Hâc Ahmed b. Abdullah, Rıdvan b. Abdullah, el-Hâc Cafer b. Abdullah, Mehmed b. İslâm, Ahmed b. Hüsam, Musa b. İshak, Sinan b. Abdullah ve gayruhüm