Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 88 Hüküm no: 71 Orijinal metin no: [9a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud Bey’in Abaza asıllı câriye ile evlendiği Abaza tâifesinden olup Mahmud Bey b. İbrahim nâm kimesnenin mülk-i müşterâsı olan Fâtıma nâm câriye tarafından husûs-ı âti’z-zikre şer‘an vekâleti sâbite olan Kaytas Bey b. Abdullah mezbûr Mahmud Bey muvâcehesinde takrîr-i kelâm edip mezbûr Mahmud müvekkilem merkūme Fâtıma’yı vilâyet-i mezbûrede Emilsaho nâm beyden kendiye nikâh etmek için iştirâ edip nikâh dahi etmişdir hâlen câriye-i mezbûre[yi] bey‘ etmek ister imiş vâki‘ hâl mezbûr Mahmud Bey’e suâl olunmasın taleb ederin dedikde gıbbe’s-suâl merkūm Mehmed Bey husûs-ı mezbûru inkâr ile cevâb vericek müdde‘î-i merkūmdan kelâmına muvâfık beyyine taleb olundukda udûl-i müslimînden el-Hâc Ahmed b. Abdullah ve Yusuf b. Abdullah nâm kimesne[ler] li ecli’ş-şehâde meclis-i şer‘a hâzırân olup istişhâd olundukda edâ-i şehâdet-i şer‘iyye edip fi’l-vâki‘ merkūm Mahmud Bey câriye-i mezbûreyi bizim huzûrumuzda mûmâ-ileyh beyden kendime nikâh etmek için iştirâ ettim deyû ikrâr edip biz bu husûsa şâhidleriz şehâdet-i şer‘iyye dahi ederiz dediklerinde gıbbe’t-ta‘dîl ve’t-tezkiyye mâ vaka‘a alâ vukū‘ihî kayd olundu. Tahrîren fi’l-yevmi’l-hâmis aşer min Şevvâli’l-mükerrem sene hamse ve elf. Şuhûdü’l-hâl: Hüseyin Bey b. Abdullah, Cafer Bey b. Abdullah, Firdevs Bey b. Abdullah, Receb Bey b. İbrahim, Nebi b. Murad, Ali Bey b. Abdullah, Murad b. Abdullah, Ali Bey b. Abdullah, Hüsrev bin Abdullah ve gayruhüm