Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 130 Hüküm no: 126 Orijinal metin no: [17a-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdi Bey’in el-Hâc Hüseyin’e ödünçten borcu olduğu Mevlânâ Mehmed b. Alâaddin b. el-Hatîb ve eş-Şeyh Mehmed Çelebi b. eş-Şeyh Ahmed el-İmâm ve el-Hâc Hüseyin b. Ahmed nâm kimesneler meclis-i şer‘-i şerîfe hâzırûn olup, hâric-i mahmiye-i Galata mahallâtından Müeyyedzâde mahallesinde bundan akdem fevt olan Abdi Bey b. Mahmud’un eytâm-ı sıgārına kıbel-i şer‘den mansûb vasî olan ve husûs-ı âti’l-beyânı münkir bulunan Mustafa b. Ali nâm hasm-ı câhid mahzarında, merhûm el-Hâc Hüseyin’in eytâmına vasiyy-i şer‘î olan hâmil-i hâze’l-kitâb el-Hâc Kasım b. Abdullah’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müteveffâ-yı mezbûr hâl-i hayâtı ve kemâl-i sıhhatinde eytâm-ı mezbûr malından ve karz cihetinden üzerinde ve zimmetinde lâzımü’l-edâ ve vâcibü’l-kazâ râyicü’l-vakt on altı bin akçe ve 98 senesi Zilhicce ayının gurresinden [bir sene tamâmına] müeccel olan müşterâ-yı makbûz çuka bahâsından iki bin akçe deyni olduğunu bizim yanımızda ve katımızda ikrâr ve i‘tirâf etti. Vasiyy-i mezbûrun meblağ-ı merkūmu bi vechin mine’l-vücûh ve sebebin mine’l-esbâb kısmen veya tamâmen ahz ü kabz etmediğine yemîn etmesinden ve şâhidlerin şehâdetlerinin ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmasından sonra mûcebince meblağ-ı mezbûrun müteveffâ-yı mezkûrun muhallefâtından edâsına hükm edildi. Cerâ zâlike hurrire fi’l-yevm ve’l-ışrîn min şehri Cumâdelâhire sene hamse ve elf. Şuhûd: Ahmed Çelebi b. Abdurrahman, el-Hâc Hüseyin b. Abdullah el-Hayyât, Ömer Çelebi b. Hüsrev, el-Hâc Ali b. Abdullah, Kasım Bey b. Abdullah, el-Hâc Yusuf b. el-Hâc Ömer ve gayruhüm