Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 130 Hüküm no: 127 Orijinal metin no: [17a-3, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hânî Hatun bt. Ali’nin kocası Pervane Bey’de ödünçten alacağı olduğu Ali Reis b. Abdullah ve Ali b. Abdullah nâm kimesneler meclis-i şer‘-i şerîfe hâzırân olup, mahmiye-i Galata müzâfâtından Kasımpaşa kasabası mahallâtından Surûrî mahallesinde bundan akdem fevt olan merhûm Pervâne Bey b. Abdullah’ın İsmi ve Ümmühân nâm sagīreynine kıbel-i şer‘den mansûb vasî olan ve husûs-ı âti’z-zikri münkir bulunan Mustafa Çelebi b. Halil nâm hasm-ı câhid mahzarında, müteveffâ-yı mezbûrun zevcesi ve vârisi Hânî Hâtun bt. Ali kıbelinden vekîl edilen hâmil-i hâze’l-kitâb Mehmed Çelebi b. Mustafa’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müteveffâ-yı mezkûr hâl-i hayâtı ve kemâl-i sıhhatinde, üzerinde ve zimmetinde karz-ı hasen-i şer‘î cihetinden müdde‘iye-i mezbûreye lâzımü’l-edâ ve vâcibü’l-kazâ râyicü’l-vakt bin akçe deyni olduğunu bizim yanımızda ve katımızda ikrâr ve i‘tirâf etti. Müdde‘iye-i mezbûrenin meblağ-ı merkūmu bi vechin mine’l-vücûh ve sebebin mine’l-esbâb kısmen veya tamâmen ahz ü kabz etmediğine yemîn etmesinden ve şâhidlerin şehâdetlerinin ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmasından sonra mûcebince meblağ-ı mezbûrun müteveffâ-yı mezkûrun muhallefâtından edâsına hükm edildi. Cerâ zâlike [ve] hurrire fi’l-yevmi’s-sânî ve’l-ışrîn min şehri Şevvâli’l-mükerrem sene hamse ve elf. Şuhûd: El-Hâc Mehmed b. Süleyman el-Münâdî, Mehmed b. Hüdâverdi, Osman [b.] Cafer, İbrahim b. Ali Reis, Hüsrev b. Abdullah, Mustafa b. Ali ve gayruhüm