Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 131 Hüküm no: 128 Orijinal metin no: [17a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gürcü asıllı câriyenin Rahime Hatun’a ait olduğu Bundan akdem mahmiye-i Galata hâricinde Kasımpaşa mahallâtından Sirkeci mahallesinde sâkin iken vefât eden merhûm Abdi Çelebi b. Mehmed nâm kimesnenin zevcesi ve vârisesi olan Rahime Hâtun bt. Hasan nâm hâtun meclis-i şer‘-i şerîfe müteveffâ-yı mezbûrun evlâd-ı sıgārı olan Abdülbâkī ve Ümmi ve Rahime ve Fâtıma nâm sagīrlerin vasiyy-i şer‘îsi olan Abdülganî b. Abdi nâm kimesneyi ihzâr ve mahzarında takrîr-i da‘vâ edip işbu uzun boylu açık kaşlı gök elâ gözlü Gürciyyetü’l-asl olan Server nâm câriye hâlen benim mülk-i müşterâm olup malım ile beş bin nakd-i râyic fi’l-vakt akçeye iştirâ eyledim, el-hâletü [hâzihî] vasiyy-i merkūm câriye-i mezbûreyi fuzûlî kabz edip tasarruf eder, vâki‘ hâl mezbûr Abdülganî’den suâl olunup men‘ ü def‘ olunmasın taleb ederin dedikde gıbbe’s-suâl vasiyy-i merkūm câriye-i mezbûreyi merkūme Rahime Hâtun’un mülk-i müşterâsı olduğunu inkâr ile cevâb vericek müdde‘iye-i mezbûreden sıdk-ı makāline beyyine taleb olundukda udûl-i müslimînden ve sikāt-ı muvahhidînden Hamza b. Turhan ve Abdurrahman b. Mehmed nâm kimesneler li ecli’ş-şehâde meclis-i şer‘a hâzırân olup istişhâd olundukda edâ-i şehâdeti şer‘iyye edip fi’l-vâki‘ zikr olunan evsâf ile mevsûf câriyeyi merkūme Rahime Hâtun kendi malından beş bin nakd-i râyic fi’l-vakt akçeye iştirâ edip câriye-i mezbûre mülk-i mahzı ve hakk-ı sırfıdır vechen mine’l-vücûh ve sebeben mine’l-esbâb câriye-i merkūmede müteveffâ-yı mezbûrun alâka ve medhali yoktur, biz bu husûsa şâhidleriz şehâdet-i şer‘iyye dahi ederiz dediklerinde mezbûrânın şehâdetleri ba‘de ri‘âyeti şerâiti’l-kabûl hayyiz-i kabûlde vâki‘ oldukdan sonra mâ vaka‘a alâ vukū‘ihî bi’t-taleb ketb ve imlâ olundu Târihi’l-mezbûr sene 1005. Şuhûd: Mehmed b. Cafer el-Müezzin, mevlânâ Ali Çelebi b. el-Hâc Yusuf, Hüsrev b. Abdullah, mevlânâ Mehmed Efendi b. Nurullah ve Habib b. Nuh el-Kâtib ve gayruhüm