Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 159 Hüküm no: 171 Orijinal metin no: [24a-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yasemin bt. Abdullah’ın Osman b. Mehmed’de ödünçten alacağı olduğu Bayram b. Ali ve Mehmed b. Abdullah nâm kimesneler meclis-i şer‘-i şerîfe hâzırân olup, merhûm Osman b. Mehmed er-Râcilin Mustafa ve Âişe nâm sagīreynine vasî olan Hasan Halîfe b. Murad mahzarında, mahalle-i mezbûrede sâkine olan hâmiletü hâze’l-kitâb Yasemin bt. Abdullah’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müdde‘iye-i mezbûre Yasemin’in müteveffâ-yı mezbûrun zimmetinde karz-ı şer‘î cihetinden lâzımü’l-edâ ve vâcibü’l-kazâ râyicü’l-vakt üç bin yedi yüz akçe hakkı vardır. Müdde‘iye-i merkūme meblağ-ı mezkûru küllen ve ba‘zan almayıp ve havâle etmeyip ve bi vechin mine’l-vücûh zimmetini ibrâ etmediğine istihlâf olunup yemîn billâh ettikden ve şâhidlerin şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber oldukdan sonra mûcebince hükm edildi. Mezbûre Yasemin sonra meblağ-ı merkūmu vasiyy-i mezbûr yedinden teslîm aldığını ikrâr etti. Vâki‘ ikrâr, vasiyy-i merkūm tarafından vicâhen ve şifâhen tasdîk edildi. Cerâ zâlike ve hurrire fî evâili Muharremi’l-harâm sene sitte ve elf. Şuhûd: Es-Sâbikūn