Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 170 Hüküm no: 184 Orijinal metin no: [26a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Câriyenin hibe edilmediği Budur ki Bundan akdem hâric-i Galata Müeyyedzâde mahallesinde vefât edip verâseti zevci Hasan Reis b. Abdullah ve vâlidesi Hatice Hâtun bt. Memi ve sagīr oğulları Abdi ve Mustafa nâm kimesnelere münhasıra olan Emine bt. Mustafa nâm müteveffâtın vâlidesi ve sagīreynin vasiyyesi olan mezbûre Hatice meclis-i şer‘-i şerîfde müteveffât-ı mezbûrenin zevci mezbûr Hasan Reis mahzarında bi’l-vesâye takrîr-i da‘vâ edip mezbûr Hasan Reis zevcesi mezbûre Emine Hâtun’a hâl-i hayâtında ve kemâl-i sıhhatinde Yasemin nâm câriyesini hibe ve temlîk ve teslîm eyleyip mezbûre hâtun dahi ittihâb ve tesellüm edip nice müddet tasarruf ettikden sonra mezbûr câriyeyi mezbûr Hasan Reis’in gaybetinde dört bin akçeye bey‘ eyleyip ba‘dehû bir câriye dahi iştirâ etmek lâzım geldikde mezbûr Hasan Reis zikr olunan dört bin akçe bir câriyeye dahi vefâ etmemekle iki bin akçe kendi malından katıp altı bin akçeye Peymâne nâm câriyeyi iştirâ eyledikde dört bin akçe zevcem mezbûre Emine’nin hakkıdır deyû i‘tirâf etmiş iken mezbûr Hasan Reis hâlen mezbûre Peymâne mülkümdür deyû fuzûlen kabz eyledi dört bin akçeyi muhallefâta idhâlden imtinâ‘ eder suâl olunsun dedikden sonra mezbûr Hasan Reis’e suâl olundukda zevcem mezbûre Emine mezbûre Yasemin mülküm iken fuzûlen dört bin akçeye bey‘ eyledi ba‘dehû bir câriye dahi almak lâzım gelmekle dört bin akçeye iki bin akçe dahi katıp altı bin akçeye mezbûre Peymâne’yi iştirâ eyledim zikr olunan altı bin akçe cümle benim mülkümdür mezbûre Yasemin’i mezbûre Emine’ye hibe etmedim dört bin akçe dahi mezbûre Emine’nin hakkıdır demedim deyû cevâb vermekle mezkûre Hatice’den sıdk-ı makāline beyyine taleb olundukda beyyineden âciz olmağla mezbûr Hasan Reis’e mezbûre Yasemin’i mezbûre Emine’ye hibe etmediğine ba‘dehû zikr olunan dört bin akçe zevcem mezbûre Emine’nin hakkıdır demediğine yemîn teklîf eyledikde yemîn billâh ettikden sonra mâ hüve’l-vâki‘bit-taleb kayd olundu. Fî evâsıtı Safer sene sitte ve elf. Şuhûd: Musli Muhzır, Mehmed b. Yusuf, Hasan Beşe b. Sarrâc, Hasan b. Abdullah ve gayruhüm