Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 229 Hüküm no: 269 Orijinal metin no: [41b-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayni bt. İlyas’ın ev bedelinden Mustafa b. Halil’de alacağı olduğu Mustafa Reis b. İsa ve el-Hâc Mustafa b. Hüseyin ve (…) nâm kimesneler meclis-i şer‘-i şerîfe hâzırûn olup Kasımpaşa kasabası mahallâtından Kulaksız mahallesinde bundan akdem fevt olan merhûm Mustafa b. Halil’in muhallefâtına vâzı‘-ı yed olan, Havâss-ı mahrûse-i Kostantıniyye ve Galata’da vâki‘ beytülmâl emîni fahrü’l-akrân Mehmed Çavuş b. Abdülmennân mahzarında ve müteveffâ-yı mezbûrun zevcesi ve vârisi Nisâ Hâtun bt. Dede kıbelinden husûs-ı âti’z-zikre vekâleti bimâ hüve nehcü’s-sübût sâbit olan Cafer b. Abdullah mahzarında, babası bundan akdem el-Hâc Ferhad mahallesinde fevt olan Aynî bt. İlyas nâm sagīreye kıbel-i şer‘den mansûb vasî olan bâ‘is-i tahrîr-i hâze’l-kitâb Mehmed b. Ali’den sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müteveffâ-yı mezbûrun zimmetinde, sagīre-i merkūmeye babasının muhallefâtından irs-i şer‘le kalan mallardan el-Hâc Hasan mahallesinde kâin, hudûdu inde’l-cîrân ma‘lûm olan menzilin istiğlâl yoluyla iştirâsı cihetinden râyicü’l-vakt on bir bin akçe deyn vardır. Şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmağın ba‘de’t-tahlîfi’ş-şer‘î mûcebince hükm edildi. Cerâ zâlike ve hurrire fî evâili Recebi’l-mürecceb sene sitte ve elf. Şuhûd: Es-Sâbikūn