İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 428 Hüküm no: 521 Orijinal metin no: [220-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İyi kalite sof şalının bir ziraının altmış beş paraya satılacağına dair sofçuların taahhüt ve tescil olunması Sofçuların ta‘ahhüdlerinin i‘lâmıdır. Ta‘ahhüd-i esnâf-ı sofcuyân sâkin-i hân ve sofçuyân-ı Ankara ber-mûceb-i i‘lâm-ı Mehmed Hamid Efendi kādı-i İstanbul el-müverrah fî 17 L sene 1179. Bâ-fermân-ı âlî sene 29 L sene [1179] A‘lâ şâlî, 1 zirâ‘ 65 para Bundan akdem i‘lâm olunduğu üzere Çarşamba günü huzûr-ı âlîde Ankara’dan Âsitâne-i aliyye’ye sof şalı getirenler ile Sofçular Hanı’nda sâkin kadîm sofçular beyninde merkūm Ankaralıların sâkin oldukları handan kalkıp Sofçular Hanı’nda sâkin olmaları ve hilâf-ı fermân istedikleri mahâlde bey‘lerine dâir olan nizâ‘larına faysal verilmek esnâsında Ankaralılar biz pek a‘lâ şâlînin zirâ‘ını altmış beş paraya veririz <> dediklerinde biz dahi pek a‘lâ şâlînin zirâ‘ını altmış beş paraya veririz demeleriyle işbu ta‘ahhüdleri tescîl olunmak için sâdır olan fermân-ı âlîlerine imtisâlen zabt ü tescîl olunduğunu müş‘ir hâlâ İstanbul kādısı Mehmed Hamid Efendi i‘lâm vermeğin i‘lâmı Başmuhâsebe’ye kayd ve ta‘ahhüdlerinin mugāyiri hareket etmemeleri İstanbul kādısı fazîletlü efendi taraflarından gereği gibi tenbîh ve te’kîd olunması için ilmühaberi verilmek bâbında fermân-ı âlîşân sâdır olmağın mûcebince kaydolunup işbu ilmühaber kāimesi verildi. Fî 29 min-L sene 1179.