İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 429 Hüküm no: 522 Orijinal metin no: [220-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çorba, kebap ve sair yemeklerin sokak aralarında gezerek satılmaması Aşçı ve kebabçı, sokakda pişmiş ta‘âm müzâyede etmemek üzere ta‘ahhüd. Ma‘rûz, Mahmiye-i İstanbul’da aşçı ve kebabçı ve şerbetçi ve çörenci esnâfından kethüdâları Ahmed ve yiğitbaşıları Hasan ve ustalarından es-Seyyid İsmail ve el-Hâc İbrahim ve el-Hâc Ali ve Mehmed Odabaşı ve Osman Beşe ve Mehmed Beşe ve İbrahim ve Ömer Beşe ve Ali ve es-Seyyid Süleyman ve Abdullah ve İsmail ile zimmî ustalarından Yani ve Kiryako ve İlya ve Petko ve Tanaş ve Hıristo ve Anaştaş ve Duko ve Yuvan ve Ermeni tâifesinden Manas ve Tapik ve Panayot ve Matos ve Karabet ve Avanis ve Agob ve Varsam ve Kirkor ve diğer Agob ve Filyoz [221] meclis-i şer‘-i şerîfe ihzâr eyledikleri Tavukpazarı’nda Aşçı Arslan ve Mercan’da Aşçı İstefan ve Mahmudpaşa’da Aşçı Asador nâm zimmîler muvâcehelerinde mesfûrûn nizâm-ı kadîmimize mugāyir hareket edip dükkânlarında tab‘ eyledikleri pişmiş ta‘âmları tabla üzerine koyup ve nân-ı azîzi peştemâl ile bellerinden aşağı önlerine bağlayıp tahkīr ve bezistân etrâfında çarşılarda me’kûlât-ı sâire misillü müzâyede ve sokakları dîk olmağla müzâheme ve müsâdemeden ibâdullahın esvâbını telvîs ederler deyü teşekkî etdiklerinde onlar dahi fî-mâ-ba‘d tabla ile hilâf-ı mu‘tâd ta‘âm müzâyede etmeyip çarşıda sokak aralarında olan müşterîlerinin dükkânlarına ancak sahan ve çanak ile ve nân-ı azîzi arkalarında getirip ve sâir hân ve odalardan ta‘âm isteyenlere ne mikdâr ta‘âm iktizâ eder ise öteden beri olageldiği minvâl üzere dükkânlarında bey‘ ve ba‘dehû tabla ile getirip nizâma mugāyir hareket etmemek üzere ta‘ahhüd ve bu nizâm üzere cümlesi ittifâk ve râbıta-i kaviyeye rabt için içlerinden hilâfına hareket eder olursa te’dîben Müslimi kal‘aya ve zimmî olanları küreğe vaz‘ olunmak üzere râzılar olup ber-vech-i meşrûh kat‘-ı nizâ‘ eyledikleri tescîl olunup iltimâslarıyla huzûr-ı âlîlerine i‘lâm olundu. Fî 3 min-Zilka‘de sene 1179.