İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 430 Hüküm no: 523 Orijinal metin no: [221-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un Camcı Ali Bey vakfından iki adet dükkân hakkında Emine Hatun aleyhindeki talebinde anlaşma sağlanması Vezneciler içinde vâki‘ menzilden 100 [guruş] ibrâ Ma‘rûz, Mahmiye-i İstanbul’da Nahılbend’de sâkin Hâfız İbrahim Efendi b. el-Hâc Hasan nâm müteveffânın sulbiye kebîre kızı ve hasran vârisesi mu‘arrefetü’z-zât arzuhâl eden Şerîfe Hadîce meclis-i şer‘-i şerîfde nezâret-i dâ‘îlerinde olan evkāfdan Camcı Ali Bey Vakfı’ndan Vezneciler içinde bir tarafdan yine vakf-ı mezkûr dükkânı ve bir tarafdan Ahmed Ağa bahçesi ve bir tarafdan câmi‘-i şerîf ve bir tarafdan tarîk-i âm ile mahdûd biri derzi ve biri kurâbiyeci iki kepenk dükkâna mahlûlden mütevellî temessüküyle vâzı‘atü’l-yed olan mu‘arrefetü’z-zât Emine bt. Şa‘bân nâm hatun mahzarında vakf-ı mezkûr mütevellîsi es-Seyyid Mehmed Said Bey hâzır olduğu hâlde zikr olunan dükkânlara taraf-ı vakf-ı mezkûrdan babam müteveffâ-yı mezbûr Hâfız İbrahim Efendi üzerinde iken işbu hâzır bi’l-meclis Tatar Mehmed’in mûrisi Cebeciler Kethüdâsı Mehmed Ağa b. Musa’dan ikrâz eylediği dört yüz elli guruş deyni mukābelesinde bin yüzyetmiş senesi Cumâdelûlâsı’nın gurresinde ferâğ bi’l-vefâ tarîkiyle ferâğ edip bu vechile mezbûr Kethüdâ Mehmed Ağa’nın üzerinde iken bu esnâda bilâ-veled fevt oldukda mütevellî-i mezbûr mahlûlünden işbu mezbûre Emine’ye icâr etmekle hâlâ ben edâ-yı deyn ve fekk-i ferâğ murâd ederim deyü tasaddî eylediği da‘vâsına ikāme eylediği şâhidleri edâ-yı şehâdet edemeyip şâhid-i âdil ikāmetinden aczi zâhir olmağla mütevellî-yi mezbûr mürüvveten mezbûre Emine için bi-tarîkı’s-sulh müdde‘iye-i mezbûre Hadîce’ye yüz guruş verip ve da‘vâsından zimmetini ibrâ etdikde ol dahi yüz guruşu ahz u kabz edip zikr olunan dükkânlara müte‘allıka âmme-i de‘âvîden gerek mezbûre Emine’nin ve gerek mütevellî-i mezbûr es-Seyyid Mehmed Said Bey’in zimmetlerini ibrâ-i küllî ile ibrâ ve iskāt etdikde onlar dahi ibrâsını kabûl ve bu minvâl üzere kat‘-ı nizâ‘ eyledikleri rızâlarıyla tescîl olunup mübâşir İbrahim Çavuş kulları iltimâsıyla huzûr-ı âlîlerine i‘lâm olundu. Fî 4 Zilka‘de sene 1179.