İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 430 Hüküm no: 524 Orijinal metin no: [221-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kostanti’nin yoğurtçu esnafından Kosta aleyhindeki gedik iddiasından men olunması Yoğurtçular kethüdâsından da‘vâ-i gedik Ma‘rûz, Mahmiye-i İstanbul’da mütemekkin Kostanti nâm zimmî meclis-i şer‘-i hatîrde mahmiye-i mezbûrede Yoğurtçu ustalarından Langa Yenikapısı’nda kârhânesi olan Kosta nâm zimmî muvâcehesinde merkūm Kosta’nın müstecir olduğu kârhânenin gediği aslında Devoğluyokuşu’nda olup bundan akdem Ahırkapı’da bir dükkâna nakil olundukdan sonra ben altmış guruşa bir zimmîden iştirâ ve içine âlât-ı lâzımemi koyup yoğurtçuluk işler iken zarâr edip medyûn olmamla zikr olunan dükkânı kapayıp ve âlât-ı lâzımemi menzilime nakil eylediğimde yoğurtçular kethüdâsı ol gediği mârrü’z-zikr Langa Yenikapısı’na nakil ve işbu Kosta’ya verip hâlâ ben yine Yoğurtçuluk [222] işlemek murâd etmemle gediğimi merkūm Kosta’dan taleb ederim deyüp lâkin gedik i‘tibâr olunan âlât-ı lâzımesini kendisi ihrâç etdiğini i‘tirâf ve sâhibi dahi dükkân-ı mezkûru na‘alband dükkânı etmekle şer‘an mesmû‘a olmayıp ve mârrü’z-zikr dükkân yoğurtçu esnâfının taht-ı nizâmlarına dâhil olmadığını ustaları haber vermeleriyle merkūm Kostanti bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 4 min-Zilka‘de sene 1179.