İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 435 Hüküm no: 530 Orijinal metin no: [224-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Unkapanı civarında Tekirdağı İskelesi’nde yanmış olan Yahudihane ve mahzenlerin yeniden inşa olunması Kapan hâricinde muhterik olan Yahûdîhâne ve mahzenleri keşf Ma‘rûz, Kapan-ı dakīk tüccârı imzâsıyla mübârek rikâb-ı müstetâba verilen arzuhâl hâmişinde sâdır olan fermân-ı âlîlerine imtisâlen kapan-ı mezbûr hâricinde Tekfurdağı İskelesi’nde vâki‘ bundan akdem muhterik olan Yahûdîhâne ve tahtında olan mahzenlerin Haremeyn-i muhteremeyn müfettişi müderrisîn-i kirâmdan Ahmed Necib Efendi dâ‘îleri tarafından mürsel Mehmed Samih Efendi ve devletlü inâyetlü Sadr-ı a‘zam nezâretlerinde olan evkāf müfettişi müderrisîn-i kirâmdan Ali Efendi ve semâhatlü inâyetlü veliyyü’n-ni‘am ve Şeyhülislâm-ı -sellemehü’s-selâm- hazretlerinin nezâret-i aliyyelerinde olan evkāf müfettişi mevâlî-i izâmdan fazîletlü Muradzâde es-Seyyid Ahmed Efendi ile dâ‘îhâneye <> zikr olunan Yahûdîhâne mütevellîleri ve müstecirleri ihzâr ve senedât ve temessükâtlarına nazar olundukda Haremeyn-i muhteremeyn nezâretlerinde olan evkāfdan on iki bâb ve Sadr-ı a‘zam hazretleri nezâretlerinde olan evkāfdan üç bâb veliyyü’n-ni‘am hazretleri nezâretlerinde olan evkāfdan iki bâb ve İslambol kādıları nezâretlerinde olan evkāfdan iki bâb ki cem‘an on sekiz bâb Yahûdîhânenin ve tahtında yirmi altı kıt‘a mahzen temessükâtlarında muharrer olup lâkin müstecirûn-ı mezbûrûnun müdde‘îleri olan mezkûr mahzenlerde sâkin kirâcıları hâzirûn olmamağla ihtiyâten mûmâ-ileyhim müfettiş efendiler dâ‘îleri ve taraf-ı dâ‘îlerinden dahi mürsel yine müderrisîn-i kirâmdan es-Seyyid Halil Efendi ve Mimar Ağa tarafından Mehmed Emin mahâll-i mezkûre varıp zikr olunan Yahûdîhâne ve mahzen ve dükkânların mahâllerini ba‘de’l-mu‘âyene kable’l-harîk ber-vech-i muharrer mevcûd iken muhterik olup ke’l-evvel binâ olunduğu sûrete kimesneye zarârı yokdur deyü mehâzîn-i merkūme müstecirlerinden hâzır olmayan iki nefer kirâcılar mâ‘adâ kırk neferden mütecâviz mazbûtü’l-esâmi kimesneler ihbâr ve zarârı olduğunu haber verir kimesne bulunmayıp ve arzuhâli veren kim olduğu ma‘lûmumuz dahi değildir ve arzuhâlden dahi haberimiz yokdur deyü gerek merkūm kirâcılarından ve gerek ol mahâlde olan sâir Müslimîn takrîr eylediklerini mahâllinde ketb ü tahrîr ve gelip inhâ etmeleriyle ma‘lûm-ı devletleri buyruldukda emr ü fermân hazret-i [men-lehü’l-emrindir]. Fî 20 Şevvâl sene [1]179.