İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 446 Hüküm no: 549 Orijinal metin no: [230-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sadrazam silahşorlarından Hüseyin Ağa’nın Adana’daki bir miras olayından dolayı Abdülvahab Ağa’yı vekil tayin etmesi Câmûsî el-Hâc Hüseyin Ağa hisse-i şâyi‘asına tevkîl Mahmiye-i İstanbul’da Ahırkapı kurbünde Akbıyık mahâllesi ahâlîsinden ve silahşor-ı hazret-i Sadr-ı a‘zamîden Câmûsî el-Hâc Hüseyin Ağa b. Ali b. Mehmed meclis-i şer‘-i şerîf-i enverde yine silahşor-ı Sadr-ı a‘zamîden bâ‘isü’l-vesîka el-Hâc Abdülvahab Ağa b. el-Hâc Ahmed mahzarında ikrâr ve takrîr-i kelâm edip târîh-i kitâbdan beş ay mukaddem vilâyet-i Anadolu’da medîne-i Adana’da sâkin iken fevt olan Kethüdâyeri demekle ma‘rûf Ahmed Ağa’nın babası Süleyman’ın babası Ahmed ile benim ceddim mezbûr Mehmed li-ebeveyn karındaşlar olup babaları ismi Abdullah ve dedeleri ismi Abdurrahman ve maskat-ı re’sleri zikr olunan Adana olmağla müteveffâ-yı merkūmun verâseti zevce-i metrûkesi Fâtıma ile li-ebin kız karındaşı Âişe’ye ve bana münhasıra ve tashîh-i meselesi dört sehmden olup sihâm-ı mezkûreden bir sehmi zevce-i mezbûreye ve iki sehmi kız karındaşı merkūmeye ve bâkī bir sehmi bana isâbet etmekle ben ber-mûceb-i tashîh-i mezkûr hisse-i ırsiyeme isâbet eden sehm-i şâyi‘imi ol tarafda müteveffâ-yı merkūmun hîn-i vefâtında terekesine vâzı‘ü’l-yed olanlardan ve sâir zimem-i nâsda olan hukūkunu dahi ashâb-ı zimemden taleb ve da‘vâ ve ahz u kabza ve bana îsâl ve teslîme ve lede’l-iktizâ sulh ve ibrâya ve bunlar mütevakkıf olduğu umûrun küllîsine merkūm el-Hâc Abdülvahab Ağa’yı tarafımdan tevkîl ve nâib-i menâb nasb ü ta‘yîn ve ihtiyâr eyledim dedikde ol dahi ber-vech-i muharrer vekâlet-i mezbûreyi kabûl ve merâsimini mahâllinde kemâ-yenbağī ikāme ve edâya ta‘ahhüd etmeğin mâ-vaka‘a bi’l-ibtigā ketb ü sebt ve imlâ olundu. Fi’l-yevmi’s-sâdis min-Şa‘bâni’l-mu‘azzam li-sene tis‘a ve seb‘în ve mi’ete ve elf. Şuhûdü’l-hâl: Ali b. Abdullah, Yusuf b. Veli, diğer Ali b. Abdullah, Ali Çavuş Ağa, silahşor-ı Sadr-ı a‘zamî el-Hâc Ahmed Ağa ve gayruhum.