İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 446 Hüküm no: 550 Orijinal metin no: [231-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mısır tüccarından Osman b. Süleyman’a olan borcunu ödemesi hususunda Yoseb v. Sima’ya tenbihte bulunulması Hukūk, 1500 [guruş] Ma‘rûz, Mahmiye-i İstanbul’da Çukurhan’da Mısır tüccârından el-Hâc Osman b. Süleyman meclis-i şer‘-i enverde Ortaköy’de ekmekçi ustalarından Yoseb v. Sima nâm zimmî muvâcehesinde benim gāib ani’l-meclis Mısırlı Sahak nâm zimmî zimmetinde cihet-i şer‘iyyeden bin beş yüz guruş hakkım olup merkūm Sahak zimmînin dahi işbu merkūm Yoseb zimmetinde bin beş yüz guruş hakkı olmağla merkūm Sahak beni işbu merkūm Yoseb üzerine havâle-i mukayyede-i sahîha-i şer‘iyye ile havâle etdikde her birimiz kabûl ve hattâ merkūm Yoseb yetmiş sekiz senesi Recebi gurresinde meblağ-ı merkūm mukābelesinde karye-i mezbûrede vâki‘ fırın ve değirmende olan âlâtının nısfını rehin olmak üzere yedime vaz‘ ve meblağ-ı merkūm dahi karzdan deyni olmak üzere temessük dahi vermiş idi deyü takrîrine mutâbık bir kıt‘a temessük ibrâzıyla meblağ-ı mezkûru da‘vâ, ol dahi cevâbında cihet-i havâle-i mezkûreden müdde‘î-i merkūm el-Hâc Osman’a bin beşyüz guruş deyni olduğunu ve temessük-i mezkûr dahi kendinin olduğunu ikrâr u i‘tirâf etmeğin mûcebiyle meblağ-ı mezkûr bin beşyüz guruşun edâsıyla merkūm Yoseb ilzâm olunduğu mübâşiri çavuş kulları iltimâsıyla huzûr-ı âlîlerine i‘lâm olundu. Fî 8 min-Şa‘bân sene 1179.