İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 447 Hüküm no: 551 Orijinal metin no: [231-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yoğurtçular esnafı kethüdası Ali’nin azledilerek yerine Mustafa b. Ali’nin tayin olunması Nasb-ı kethüdâ-i yoğurtçuyân Mahmiye-i İstanbul’da Yoğurdçu esnâfından kârhâne müstecirleri Mustafa ve Halil ve diğer Mustafa ve Hasan ve İbrahim ve Ahmed ve diğer Ahmed ve İsmail ve diğer Hasan ve Hüseyin ve Mehmed ve âhar Mehmed ve âhar Ahmed ve Arnavud Hüseyin ve Yusuf ve es-Seyyid İbrahim ve Ali nâm kimesneler ile zimmîlerden Dimo ve Todori ve Lazo ve Marin ve Bülbül ve diğer Dimo ve Kirko ve diğer Kirko ve Nemko ve Balto ve Yorgi ve Marko ve Yanaki ve Piço ve diğer Yanaki ve Desbot ve Marko ve diğer Marko ve Yanko ve Kosto ve İstapot ve Hıristo ve İlko meclis-i şer‘-i enverde kethüdâları Ali mahzarında bast-ı kelâm edip mezbûr Ali pîr ve alîl olup umûrumuzu edâya adem-i kudretinden gayrı üzerimize ziyâde masârıf tahmîliyle bizi tecrîm ü tağrîm etmekle mezbûrun azli îcâb etmeğin içimizde idâreye kādir emînimiz olan işbu hâzır bi’l-meclis Mustafa b. Ali nâm kimesneyi ihtiyâr eylediğimiz ecilden mezbûr Ali’yi azl ve yerine mezbûr Mustafa re’y ve ma‘rifetimiz ile kıbel-i şer‘-i şerîfden nasb olunmak matlûbumuzdur dediklerinde hakīkat-i hâl vech-i muharrer üzere olduğu zeyl-i kitâbda muharrerü’l-esâmi Müslimîn ihbârlarıyla müte‘ayyin oldukdan sonra hâkim-i muvakkı‘-ı sadr-ı kitâb bi-tevkī‘ihi’r-refî‘i’l-müstetâb tûbâ-lehû ve hüsnü-meâb efendi hazretleri dahi mezbûr Ali’yi ba‘de’l-azl yerine işbu bâ‘isü’l-kitâb mezbûr Mustafa’yı nasb ü ta‘yîn buyurduklarında ol dahi kabûl ve tâife-i mezbûrûnun umûr ve husûslarını olageldiği minvâl üzere bilâ-tecrîm ve lâ-tağrîm alâ-vechi’s-sadâkat rü’yete ta‘ahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’s-sâmin min-Şa‘bâni’l-mu‘azzam li-sene tis‘a ve seb‘în ve mi’e ve elf. Şuhûdü’l-hâl: Karaköy kapısında Mustafa, Kaliçacılar Köşkü’nde Hasan, Gedikpaşa’da İsmail, Kapalı Fırın’da Halil, Alacahamam’da Mustafa ve gayruhum.