İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 448 Hüküm no: 554 Orijinal metin no: [232-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Akideci esnafından Mustafa’nın kendi işiyle meşgul olacağı ve kimseye küfür etmeyeceğine dair taahhütte bulunması Akīdeci Mustafa ba‘de’l-yevm kendi hâlinde olmağa esnâfından ba‘zı kefil Ma‘rûz, Vârid olan fermân-ı âlîlerine imtisâlen dâ‘îhânede müderrisîn-i kirâmdan Haremeyn-i muhteremeyn müfettişi efendi dâ‘îleri hâzır olduğu hâlde mahmiye-i İstanbul’da arzuhâl eden akīdeci esnâfı kethüdâsı Mustafa ve Yiğitbaşıları Ahmed ve ustalarından Mehmed ve diğer Mehmed ve Hüseyin ve diğer Hüseyin ve el-Hâc Mehmed ve Musa ve Yusuf ve Ali ve diğer Ali ve İbrahim ve Ahmed ve Osman ve sâirleri esnâf-ı mezbûreden olup Lâleliçeşme’de câmi‘-i cedîd-i hümâyûn vakf-ı şerîfinden şekerci dükkânında müsteciren sâkin meclis-i şer‘-i hatîre ihzâr eyledikleri Mustafa b. Şaban kendi hâlinde olmayıp ve metâ‘ımız olan şekeri bizim re’y ve ma‘rifetimiz olmadan tüccârından hufyeten iştirâ ve bâ-fermân-ı âlî düstûrü’l-amel olan nizâmımızın ihtilâline bâ‘is olduğundan mâ‘adâ şütûm-ı galîza ile ba‘zılarına şetm ve ırzını hetk âdet-i müstemirresi olduğundan bundan akdem iki def‘a mezbûrun sû-i hâlini inhâ birle te’dîbi için i‘lâm ile tenbîh olunmuş iken ef‘âl-i sâbıkāsına ısrâr etmekle beynimizden [ihrâç] olunması matlûbumuzdur deyü takrîrlerine mutâbık iki kıt‘a memhûr i‘lâm ibrâzıyla teşekkî etdiklerinde mezbûr Mustafa dahi bundan sonra kendi hâlinde olup hilâf-ı nizâm ve hetk-i ırza müte‘allıka hareket etmemek üzere ahd ü mîsâk ve fî-mâ-ba‘d ederse esnâf-ı mezkûreden ihrâc olunmak üzere nefsine ve ihzârına yine esnâf-ı mezkûreden Ahmed Usta ve diğer Ahmed ve el-Hâc Ali ve el-Hâc Osman ve Mahmud ve İbrahim ve Yusuf ile hâricden Aksaray’da Derzi Hasan b. Ali ve Çubukçu Osman b. Ali’den her biri kefil ve kefâletleri te’kîd-i uhûd için tescîl olunup bu minvâl üzere cümlesi râzı ve kat‘-ı münâza‘a eyledikleri mübâşiri iltimâsıyla huzûr-ı âlîlerine i‘lâm olundu. Fî 12 min-Şa‘bân sene 1179.