İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 449 Hüküm no: 555 Orijinal metin no: [232-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aynacı esnafından Hasekioğlu Mustafa’nın kendi işiyle meşgul olup esnafın işlerine karışmayacağına dair taahhütte bulunması Hasekioğlu el-Hâc Mustafa kendi hâlinde olup esnâf umûruna müdâhale etmemeğe yoldaşları kefil Ma‘rûz, Mahmiye-i İstanbul’da Aynacı esnâfından arzuhâl eden kethüdâları el-Hâc Abdi ve yiğitbaşıları Yusuf ve ustalarından es-Seyyid Lütfullah ve Mehmed ve Selim ve Ahmed ve diğer Mehmed ile Yahûdîlerden Avram ve Zaharya ve Armiya ve Haym ve Yako ve Marya ve Kemâl meclis-i şer‘-i hatîrde esnâf-ı mezbûreden Hasekioğlu el-Hâc Mustafa kendi hâlinde olmayıp hilâf-ı şer‘ bize itâle-i lisân ve metâ‘ımızı bazergânından değer bahasıyla iştirâ ve gabn-i fâhiş ile bize cebren bey‘ eylediğinden mâ‘adâ nes’eten tüccârdan kefâletimiz ile aldığı metâ‘ın bahasını edâda mümâtale etmekle tüccâr bizden bi’l-kefâle ahz ile bizi ızrâr etmekle şer ve mazarrâtdan bize mahsûs olan mahâlden âhar mahâllere nakil eyledik deyü teşekkî, ol dahi cevâbında tâife-i mezbûrûn bâ-fermân-ı âlî düstûrü’l-amel olan nizâmımızdan hâric bana gadr irâdesiyle bazergândan iştirâ ve beynimizde tevzî‘ olunacak metâ‘dan hissemizi vermeyip benim kâr ü kisbime mâni‘ olurlar deyü mezbûrûndan teşekkî ve nizâ‘ etmeleriyle beynleri tevfîk olunup bundan sonra mezbûr Mustafa kendi hâlinde olup mezbûrûna hilâf-ı şer‘-i şerîf itâle-i lisân ve cevr ü ezâ etmemek üzere ta‘ahhüd ve eğer fî-mâ-ba‘d eder ise içlerinden ihrâç ile ta‘zîr olunmak üzere nefsine ve ihzârına Yeniçerilerden on dokuz bölük odabaşısı Yusuf ve aşçısı Hasan ve Berber es-Seyyid Ali ve Yağlıkçı es-Seyyid Halil ve el-Hâc Ahmed’den her biri kefil olmalarıyla tâife-i mezbûrûn dahi râzılar olup fî-mâ-ba‘d mezbûr Mustafa’nın bazergândan bi’n-nefs aldığı aynacı metâ‘ına tâife-i mezbûrûndan [233] bir ferd müdâhale etmeyip ve tâife-i mezbûrûnun dahi nizâmlarına ve ahz u i‘tâlarına mezbûr Mustafa dahl ü ta‘arruz ve hisse iddi‘â etmemek üzere birbirlerinin umûrlarına aslâ karışmamak şartıyla ta‘ahhüd ve ittifâk ve bu minvâl üzere kat‘-ı münâza‘a ve fasl-ı muhâsama eyledikleri mübâşirleri İbrahim Yazıcı iltimâsıyla huzûr-ı âlîlerine i‘lâm olundu. Fermân men-lehü’l-emrindir. Fî 13 min-Şa‘bân sene 1179.