İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 451 Hüküm no: 558 Orijinal metin no: [233-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yemiş İskelesinde yemişçi iken vefat eden Kara Mustafa’nın varislerinin Ali Yazıcı aleyhindeki yemişçi gediği davasında anlaşma sağlanması Yemişçi mahzeninde gedik ta‘bîr olunur desti 300 [aded] ve sâir âlâtdan sulh 180 [guruş] Mahmiye-i İstanbul’da Üskübî kurbünde İbnimüderris mahâllesinde sâkin ve Yemiş İskelesi’nde yemişçi iken bundan akdem vefât eden Kara el-Hâc Mustafa b. Mehmed b. Abdullah’ın verâseti zevce-i menkûhası Havva bt. el-Hâc Mehmed nâm hatun ile sulbiye kızları olup hîn-i fevtinde sagīre ve hâlâ kebîre olan Hadîce ve Zeyneb ve Âmine ve Emetullah’a münhasıra ba‘dehâ mezbûre Hadîce dahi vefât edip [234] verâseti zevci el-Hâc Mehmed b. Ömer ile anası mezbûre Havva’ya ve li-ebeveyn kız karındaşları mezbûrât Zeyneb ve Emine ve Emetullah’a münhasıra ba‘dehû mezbûre Emine dahi vefât edip verâseti zevci diğer Mehmed b. Hüseyin ile anası mezbûreye ve karındaşları mezbûrâna münhasıra ba‘dehû zevc-i mezbûr el-Hâc Mehmed dahi vefât edip verâseti zevce-i menkûhası Ümmügülsüm ile li-ebeveyn karındaşı oğulları İbrahim ve Ali ve Hasan ve Mahmud’a münhasıra ba‘dehû mezbûr diğer Mehmed dahi vefât edip verâseti anası diğer Emetullah ile li-ebeveyn kız karındaşı Âişe’ye münhasıra ve tashîh-i meseleleri bi-hükmi’l-münâsaha altmış bir bin dört yüz kırk sehim i‘tibârıyla on bir bin üç yüz yirmi sehim mezbûre Havva’ya ve on dokuz bin altışar yüz sehim mezbûrân Zeyneb ve Emetullah’dan her birine ve bir iki yüz altmışar sehmi zevce-i mezbûre Ümmügülsüm’e ve dokuz yüz kırk beşer sehmi mezbûrûn İbrahim ve Ali ve Hasan ve Mahmud’dan her birine ve iki bin üç yüz elli sehmi diğer Emetullah’a ve üç bin beş yüz yirmi sekiz sehmi mezbûre Âişe’ye isâbeti tahakkukundan sonra zâtı ta‘rîf-i şer‘î ile mu‘arrefe olan mezbûre Havva asâleten ve mezbûre Emetullah tarafından vech-i âtî üzere da‘vâ ve sulh [ve] ibrâyı ikrâra vekîl olduğu zâtını ârifân Molla Mehmed b. İsmail ve Hasan b. Ali nâm kimesneler şehâdetleriyle mahzar-ı hasm-ı câhidde sâbit olan Mehmed Ağa b. İsmail vekâleten ve mezbûre Zeyneb tarafından kezâlik vekîl olduğu zâtını ârifân Mehmed Ağa b. Mustafa ve Molla Mehmed b. İsmail nâm kimesneler şehâdetleriyle sâbit olan Ali b. Yusuf dahi vekâleten meclis-i şer‘-i şerîf-i enverde müteveffâ-yı evvel-i merkūm el-Hâc Mustafa’nın hayâtında tasarrufunda olup zikr olunan Yemiş İskelesi’nde vâki‘ dört bâb manzenden Ahiçelebi Vakfı’ndan olan Köşe mahzenin rub‘una taraf-ı vakıfdan hâlâ mutasarrıf ve mahzen-i merkūmda sâkin işbu bâ‘isü’l-vesîka el-Hâc Ali Yazıcı b. Mustafa mahzarında her biri ikrâr ve takrîr-i kelâm edip hâlâ mahzen-i merkūmda mevcûd gedik ta‘bîr olunur üç yüz desti ve üç kantar ve iki kazgan ve on yağ kesmesi müteveffâ-yı evvel-i merkūm el-Hâc Mustafa’nın mülkü ve ba‘de-vefâtihim ber-mûceb-i tashîh bize mevrûs olup biz dahi hissemizi icâre-i mu‘tâde ile dâmâdı mezbûr el-Hâc Mehmed’e icâr ve taht-ı icâresinde iken târîh-i vesîkadan iki buçuk sene mukaddem fevt oldukda işbu mezbûr el-Hâc Ali mahzen-i merkūmda yazıcısı olmak takrîbiyle zikr olunan eşyâya bi-gayrı hakkın vaz‘-ı yed etmekle eşyâ-yı mezkûreden isâbet eden hisse-i mezkûremizi taleb ve da‘vâ sadedinde olduğumuzda ol dahi eşyâ-yı mezkûreyi mezbûr el-Hâc Mehmed fevt oldukda veresesi ahz ve bey‘ ve nakil etmeleriyle hâlâ mevcûd değildir deyü vaz‘-ı yedini inkâr etmeğin beynimizde münâza‘ât-ı kesîre vâkı‘a olmuş idi. El-hâletü hâzihi beynimize Müslimîn tavassut edip mezbûr el-Hâc Ali rızâsıyla kat‘â li’n-nizâ‘ bize yüz seksen guruş verip ve da‘vâsından zimmetimizi ibrâ etdikde biz dahi bi-kadri’l-hısasi’l-merkūme meblağ-ı mezkûr yüz seksen guruşu yedinden ahz u kabz edip mârrü’z-zikr eşyâ-yı mezkûreye müte‘allıka âmme-i da‘vâdan mezbûr el-Hâc Ali’nin zimmetini ibrâ-i âm ile ibrâ ve iskāt edip ve her birimiz ibrâyı kabûl etmeğin mârrü’z-zikr eşyâda bizim aslâ alâka ve medhalimiz kalmadı dediklerinde mezbûr el-Hâc Ali dahi tasdîk etmeğin mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-şehri Recebi’l-ferd li-sene tis‘a ve seb‘în ve mi’e ve elf. Şuhûdü’l-hâl: el-Hâc İsmail b. Mehmed, Ali b. Hasan, Pazarbaşı Vekîli Ahmed Usta b. Mustafa, Ömer Efendi b. el-Hâc Ahmed, el-Hâc Osman b. Ali, el-Hâc Memiş b. Mustafa, Ahmed Ağa, Osman b. Ahmed, es-Seyyid Ahmed Ağa b. Mustafa, el-Hâc Ali b. Ali, el-Hâc Ali b. Mehmed ve gayruhum.