İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 453 Hüküm no: 559 Orijinal metin no: [235-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden yemişçi Kara Mustafa’nın varislerinden Havva, Emetullah ve Zeyneb’in, Ali Yazıcı aleyhindeki yemişçi gediği davasında anlaşma sağlanması Yemişçi mahzeninde gedik ta‘bîr olunur eşyâdan ibrâ, 180 [guruş] Mahmiye-i İstanbul’da yemiş iskelesinde zikri âtî mahzende yemişçi iken bundan akdem vefât eden el-Hâc Mustafa’nın vârislerinden arzuhâl eden zevcesi mu‘arrefetü’z-zât Havva asâleten ve kebîre kızı Emetullah tarafından vekâleti sâbite vekîli Mehmed ve diğer kebîre kızı Zeyneb tarafından kezâlik vekâleti sâbite Ali vekâleten meclis-i şer‘-i enverde zikr olunan iskelede vâki‘ Ahiçelebi Vakfı’ndan köşede vâki‘ mahzenin rub‘ hissesini hâlâ mutasarrıf olan arzuhâlde ismi mezkûr el-Hâc Ali Yazıcı’dan hâlâ mahzen-i mezkûrda mevcûd yemişçi gediği ta‘bîr olunur üç yüz desti ve üç kantar ve iki kazgan ve on yağ kesmesi müteveffâ-yı mezbûr el-Hâc Mustafa’nın mülkü ve ba‘de’l-vefât münâsaha tarîkiyle bize mevrûs olmuş iken hissemize bi-gayrı hakkın vaz‘-ı yed eder deyü iddi‘â ve mezbûr el-Hâc Ali cevâbında eşyâ-yı mezkûreyi müteveffâ-yı mezbûrun dâmâdı el-Hâc Mehmed nâm kimesne fevt oldukda verâseti âhara bey‘ ve nakil eylediler hâlâ mevcûd değildir deyü vaz‘-ı yedini inkâr etmeğin beynlerinde nizâ‘ vâki‘ olmuş idi. El-hâletü hâzihi mezbûr el-Hâc Ali bâ-vesâtet-i Müslimîn rızâsıyla verese-i mezbûrâna yüz seksen guruş verip ve da‘vâsından zimmetlerini ibrâ, onlar dahi bi-kadri’l-hısas ahz u kabz eşyâ-yı mezkûreye müte‘allıka âmme-i da‘vâdan mezbûr el-Hâc Ali’nin zimmetini ibrâ ve eşyâ-yı mezkûrede aslâ alâkaları kalmadığını asâleten ve vekâleten ikrârını nâtıka mufassalan hüccet verildiği mübâşiri çavuş kulları iltimâsıyla huzûr-ı âlîlerine i‘lâm olundu. Fî 25 min-Recebi’l-ferd sene 1179.